జనవరి 3న కొండగట్టుకు పవన్ కళ్యాణ్

ఏపీ ఉప ముఖ్యమంత్రి పవన్ కళ్యాణ్ జనవరి 3న తెలంగాణలోని జగిత్యాల జిల్లా కొండగట్టుకు రానున్నారు. కొండగట్టు ఆంజనేయస్వామి ఆలయ పరిసరాల్లో తిరుమల తిరుపతి దేవస్థానం (టీటీడీ) ఆధ్వర్యంలో నిర్మించనున్న ధర్మశాల పనులకు ఆయన భూమిపూజ చేయనున్నారు. ఈ ధర్మశాల నిర్మాణానికి టీటీడీ రూ.35.19 కోట్ల నిధులు కేటాయించింది.

భక్తులకు మెరుగైన వసతి సౌకర్యాలు కల్పించాలనే లక్ష్యంతో, ఈ ప్రాజెక్టులో భాగంగా 100 గదులతో కూడిన భారీ సత్రంను నిర్మించనున్నారు. పవన్ కళ్యాణ్ పర్యటనను దృష్టిలో పెట్టుకుని ఆలయ అధికారులు, జిల్లా యంత్రాంగం ఏర్పాట్లు ముమ్మరం చేశారు. ఈ ధర్మశాల పూర్తయితే కొండగట్టు వచ్చే భక్తులకు పెద్ద ఊరటగా మారనుంది.