ఆర్టీసీ సమ్మెపై ఇవాళ కీలక నిర్ణయం

రాష్ట్రవ్యాప్తంగా ఆర్టీసీ కార్మికుల సమ్మె తీవ్రతరం అవుతున్న నేపథ్యంలో సంయుక్త చర్య కమిటీ నాయకులు ఇవాళ అత్యవసర సమావేశం నిర్వహించనున్నారు. ప్రభుత్వం నియమించిన మంత్రుల కమిటీ, ఉన్నతాధికారుల కమిటీ చర్చలకు ఆహ్వానించిన నేపథ్యంలో, ఆ సమావేశానికి హాజరుకావాలా లేదా అన్న అంశంపై తుది నిర్ణయం తీసుకోనున్నారు. గత కొన్ని రోజులుగా ప్రభుత్వం చర్చలకు పిలుస్తున్నప్పటికీ, స్పష్టమైన హామీ లేకుండా సమ్మె విరమించకూడదనే అభిప్రాయంలో నాయకులు ఉన్నారు.

ఇదిలా ఉండగా నర్సంపేటలో డ్రైవర్ శంకర్ గౌడ్ ఆత్మహత్య చేసుకున్న ఘటన కార్మికుల్లో ఆందోళన కలిగించింది. అక్కడి కార్మికులకు సంఘీభావం తెలపడానికి నాయకులు నర్సంపేటకు వెళ్లే అవకాశమున్నట్లు సమాచారం. మరోవైపు ప్రభుత్వం సమస్యలను సామరస్యంగా పరిష్కరించుకుందామని కోరుతూ సమ్మె విరమించాలని విజ్ఞప్తి చేస్తోంది. ఈ పరిస్థితుల్లో నాయకులు చర్చలకు వెళ్తారా లేదా అన్న ఉత్కంఠ నెలకొంది. సమ్మె ముగింపు దిశగా అడుగులు పడతాయా లేక ఉద్యమం మరింత ఉధృతం అవుతుందా అన్నది త్వరలో స్పష్టత రానుంది.