గ్యాస్‌ సంక్షోభంపై తమిళనాడు సర్కార్‌ కీలక నిర్ణయం..

ఎల్పీజీ గ్యాస్ కొరత నేపథ్యంలో తమిళనాడు ప్రభుత్వం కీలక నిర్ణయం తీసుకుంది. ఇరాక్ యుద్ధ పరిస్థితుల కారణంగా దేశవ్యాప్తంగా గ్యాస్ సరఫరాపై ఆందోళనలు పెరిగాయి. ఇప్పటికే కమర్షియల్ గ్యాస్ సిలిండర్ల సరఫరాపై కేంద్ర ప్రభుత్వం ఆంక్షలు విధించడంతో, హోటళ్లు మరియు ఆహార తయారీ కేంద్రాలు ఎక్కువగా ఎలక్ట్రిక్ స్టౌవ్‌లను ఉపయోగించడం ప్రారంభించాయి. దీంతో విద్యుత్ వినియోగం కూడా పెరిగింది.

ఈ పరిస్థితిని దృష్టిలో పెట్టుకుని తమిళనాడు ముఖ్యమంత్రి ఎం.కె. స్టాలిన్ సచివాలయంలో ఉన్నత స్థాయి సమీక్ష నిర్వహించారు. గ్యాస్ కొరత వల్ల హోటళ్లు, టీ షాపులు, క్లౌడ్ కిచెన్‌లు, చిన్న పరిశ్రమలు (MSME) ఇబ్బందులు పడకుండా ఉండేందుకు అదనపు విద్యుత్ వినియోగంపై యూనిట్‌కు రూ.2 రాయితీ ఇవ్వాలని ప్రభుత్వం నిర్ణయించింది.

వంట గ్యాస్ బదులుగా ఎలక్ట్రిక్ స్టౌవ్‌లను ఉపయోగిస్తున్న హోటళ్లు మరియు ఆహార తయారీ యూనిట్లకు ఈ సబ్సిడీ వర్తిస్తుంది. కేంద్ర ప్రభుత్వం కమర్షియల్ గ్యాస్ వినియోగంపై విధించిన ఆంక్షలు కొనసాగుతున్నంత వరకు ఈ రాయితీ అమల్లో ఉంటుందని తమిళనాడు ప్రభుత్వం ప్రకటించింది.