అత్యుత్తమ వస్త్రాలను త‌యారు చేసిన‌ గొప్ప చరిత్ర భార‌త‌దేశానికి ఉంది - సీఎం రేవంత్ రెడ్డి

హైదరాబాదులో నిర్వహించిన ఏటెక్స్‌కాన్ 2026 సదస్సులో ముఖ్యమంత్రి రేవంత్ రెడ్డి టెక్స్టైల్ రంగ ప్రతినిధులను స్వాగతించారు. ఈ సదస్సులో పాల్గొనేవారు అతిథులు మాత్రమే కాకుండా తెలంగాణ అభివృద్ధికి భాగస్వాములు అని ఆయన తెలిపారు. భారతదేశానికి అత్యుత్తమ వస్త్రాల తయారీలో గొప్ప చరిత్ర ఉందని, టెక్స్టైల్ మన సంస్కృతి, సంప్రదాయాలతో ముడిపడి ఉందని చెప్పారు. శ్రీ రామనవమి సందర్భంగా భద్రాచలం దేవాలయానికి వస్త్రాలు సమర్పించడం తనకు గౌరవంగా భావిస్తున్నానన్నారు.

తెలంగాణలో టెక్స్టైల్ పరిశ్రమ జీవనాధారంగా ఉందని ఆయన పేర్కొన్నారు. పోచంపల్లి ఇక్కత్ నుంచి గద్వాల్ చీరలు, వరంగల్ దుర్రీస్ వరకు రాష్ట్రానికి గొప్ప సంప్రదాయం ఉందన్నారు. పత్తి ఉత్పత్తిలో తెలంగాణ అగ్రస్థానంలో ఉందని, వరంగల్‌లో మెగా టెక్స్టైల్ పార్క్ ఏర్పాటు చేసి రంగాన్ని అభివృద్ధి చేస్తున్నామని తెలిపారు. టెక్నాలజీ, ఔషధాలు, తయారీ వంటి రంగాల్లో కూడా రాష్ట్రం ముందంజలో ఉందని చెప్పారు.

“తెలంగాణ రైజింగ్ 2047” లక్ష్యంతో రాష్ట్రాన్ని 2034 నాటికి ఒక ట్రిలియన్ ఆర్థిక వ్యవస్థగా, 2047 నాటికి మూడు ట్రిలియన్ ఆర్థిక వ్యవస్థగా మార్చాలని లక్ష్యంగా పెట్టుకున్నామని తెలిపారు. పెట్టుబడిదారులను ఆహ్వానిస్తూ మౌలిక సదుపాయాలు, వేగవంతమైన అనుమతులు అందిస్తామని చెప్పారు. పర్యావరణ పరిరక్షణకు ప్రాధాన్యం ఇస్తూ గ్రీన్ టెక్స్టైల్ కేంద్రాలు అభివృద్ధి చేస్తామని, యువతకు నైపుణ్య శిక్షణ ఇస్తామని వెల్లడించారు.