మియాపూర్‌ లో ₹600 కోట్లు విలువైన ప్రభుత్వ భూమిని స్వాధీనం చేసుకున్న హైడ్రా

మియాపూర్‌లో ప్రభుత్వ భూములపై జరుగుతున్న కబ్జాలను అడ్డుకోవడంలో హైడ్రా అధికారులు కీలక చర్యలు చేపట్టారు. శేరిలింగంపల్లి మండలం, మక్తా మహబూబ్‌పేట లోని ₹600 కోట్లు విలువైన 5 ఎకరాల ప్రభుత్వ భూమిని సోమవారం స్వాధీనం చేసుకున్నారు. అలాగే, ఈ భూమి పక్కన ఉన్న చెరువు ప్రాంతంలోని మరో 5 ఎకరాలను కూడా కబ్జా చేసేందుకు జరుగుతున్న ప్రయత్నాలను సమయానికి అడ్డుకుని, మొత్తం ప్రాంతాన్ని పరిశీలించారు. చెరువు కట్టపై అక్రమంగా నిర్మించిన 18 షట్టర్లను కూల్చివేసి, వెనుక ప్రైవేట్ బస్సుల పార్కింగ్‌ను కూడా ఖాళీ చేయించారు.

అధికారుల విచారణలో ఆశ్చర్యకర నిజాలు బయటపడ్డాయి. కొందరు ప్రభావశీలుల సహకారంతో దొంగ సర్వే నంబర్‌ (44/4) సృష్టించి ప్రభుత్వ భూమిని ఆక్రమించినట్లు తేలింది. కార్ వాష్ సెంటర్‌ పేరిట కార్యకలాపాలు నిర్వహిస్తూ, 18 షట్టర్ల ద్వారా నెలకు ₹9 లక్షలు, బస్సుల పార్కింగ్ ద్వారా ₹8 లక్షలు వసూలు చేస్తున్నట్లు గుర్తించారు. ఇదే ప్రాంతంలో 2013 లో కూడా అక్రమ కట్టడాలు తొలగించబడ్డాయి, అయినప్పటికీ మళ్లీ అదే విధంగా నిర్మాణాలు చేయబడినట్లు వెల్లడైంది. భూమి తమదేనని చెప్పిన వారు ఎలాంటి చట్టబద్ధ పత్రాలు చూపలేకపోయారు.

ఈ పరిణామాల నేపథ్యంలో హైడ్రా అధికారులు వెంటనే చర్యలు చేపట్టి మొత్తం 5 ఎకరాల ప్రభుత్వ భూమి చుట్టూ ఫెన్సింగ్ ఏర్పాటు చేసి, పూర్తిగా ప్రభుత్వ ఆధీనంలోకి తీసుకున్నారు. ఈ ప్రాంతంలో భవిష్యత్తులో అక్రమ నిర్మాణాలు తిరిగి వెలువడకుండా కఠినంగా పర్యవేక్షణ కొనసాగించాలని కమిషనర్‌ ఏవి రంగనాథ్ ఆదేశించారు. ప్రజావాణికి వచ్చిన ఫిర్యాదుల ఆధారంగా ఈ చర్యలను చేపట్టడంతో, స్థానిక ప్రజలు హైడ్రా స్పందనపై సంతృప్తి వ్యక్తం చేస్తున్నారు.