సైబరాబాద్ లో డ్రంక్ అండ్ డ్రైవ్

సైబరాబాద్ పరిధిలో వీకెండ్ సందర్భంగా సైబరాబాద్ ట్రాఫిక్ పోలీస్ ప్రత్యేక డ్రంక్ అండ్ డ్రైవ్ తనిఖీలు నిర్వహించింది. ఈ తనిఖీల్లో మొత్తం 377 మంది నిబంధనలు ఉల్లంఘించిన వారిని పట్టుకున్నారు. వీరిలో రెండు చక్రాల వాహనాలు 300, మూడు చక్రాల వాహనాలు 17, నాలుగు చక్రాల వాహనాలు 58, హెవీ వాహనాలు 2గా నమోదయ్యాయి. రోడ్డు భద్రతను మెరుగుపరచడమే లక్ష్యంగా ఈ ప్రత్యేక డ్రైవ్ చేపట్టినట్లు పోలీసులు తెలిపారు.

బ్లడ్ ఆల్కహాల్ కంటెంట్ ఆధారంగా చూస్తే, 317 మందికి 35 mg/100 ml నుంచి 200 mg/100 ml వరకు BAC నమోదైంది. మరో 39 మందికి 201 mg/100 ml నుంచి 300 mg/100 ml వరకు, 21 మందికి అత్యధికంగా 301 mg/100 ml నుంచి 550 mg/100 ml వరకు నమోదైంది. ఈ కేసులన్నింటినీ గౌరవ న్యాయస్థానంలో హాజరు పరచనున్నట్లు పోలీసులు తెలిపారు. మద్యం మత్తులో వాహనం నడిపి ప్రాణాంతక ప్రమాదాలకు కారణమైతే, భారతీయ న్యాయ సంహిత–2023 లోని సెక్షన్ 105 ప్రకారం కఠిన చర్యలు తీసుకుంటామని సైబరాబాద్ పోలీసులు హెచ్చరించారు.