టెక్సాస్‌లో హనుమాన్ విగ్రహంపై వివాదం… మాగా మద్దతుదారుడి వ్యాఖ్యలపై తీవ్ర స్పందన!

అమెరికాలోని టెక్సాస్ రాష్ట్రంలో ఉన్న హనుమాన్ విగ్రహంపై మాగా మద్దతుదారుడు చేసిన వ్యాఖ్యలు తీవ్ర వివాదానికి దారితీశాయి. సుగర్ ల్యాండ్‌లోని శ్రీ అష్టలక్ష్మి ఆలయంలో ఏర్పాటు చేసిన 90 అడుగుల కాంస్య హనుమాన్ విగ్రహం ‘స్టాచ్యూ ఆఫ్ యూనియన్’గా ప్రసిద్ధి చెందింది. ఉత్తర అమెరికాలోనే అత్యంత ఎత్తైన హనుమాన్ విగ్రహంగా గుర్తింపు పొందిన దీనిపై కార్లోస్ టుర్సియోస్ సోషల్ మీడియా వేదిక ఎక్స్‌లో వీడియో పోస్టు చేసి, వలసదారుల దండయాత్రకు ఇది నిదర్శనమని వ్యాఖ్యానించారు. అమెరికాలో మూడో అతిపెద్ద విగ్రహంగా ఇది ఎందుకు ఉందని ప్రశ్నిస్తూ వివాదాస్పద వ్యాఖ్యలు చేశారు.

ఈ వ్యాఖ్యలను ఆలయ కమ్యూనిటీ సభ్యులు తీవ్రంగా ఖండిస్తూ, ఇది ప్రైవేట్ ప్రాపర్టీలో భక్తుల విరాళాలతో నిర్మించిన విగ్రహమని స్పష్టం చేశారు. నెటిజన్లు కూడా సామాజిక మాధ్యమాల్లో ఆయన వ్యాఖ్యలను వ్యతిరేకిస్తూ స్పందిస్తున్నారు. గతంలో ఇదే విగ్రహంపై రిపబ్లికన్ నేత అలెగ్జాండర్ డంకన్ చేసిన వ్యాఖ్యలను హిందూ అమెరికన్ ఫౌండేషన్ తీవ్రంగా ఖండించిన విషయం గుర్తుచేశారు. ఈ విగ్రహం మత స్వేచ్ఛ, సాంస్కృతిక వైవిధ్యానికి ప్రతీకగా నిలుస్తుందని కమ్యూనిటీ ప్రతినిధులు పేర్కొన్నారు.