తెలుగు రాష్ట్రాల్లో చలి పంజా ... పొగమంచుతో ప్రజల జీవనానికి అంతరాయం

డిసెంబర్ తొలి వారం నుంచి తెలుగు రాష్ట్రాల్లో చలి క్రమంగా ప్రారంభమై, రెండో వారానికి వచ్చేసరికి తీవ్రత మరింత పెరిగింది. ఉదయం, రాత్రి వేళల్లో దట్టమైన పొగమంచు కమ్ముకుంటుండటంతో ప్రజలు ఇబ్బందులు ఎదుర్కొంటున్నారు. గరిష్ట ఉష్ణోగ్రతలతో పాటు కనిష్ట ఉష్ణోగ్రతలు కూడా సాధారణం కంటే గణనీయంగా తగ్గడం ఆందోళన కలిగిస్తోంది.

భారత వాతావరణ శాఖ ఇప్పటికే డిసెంబర్ 24 వ తేదీ వరకు కోల్డ్ వేవ్ అలర్ట్ జారీ చేసింది. అనేక ప్రాంతాల్లో కనిష్ట ఉష్ణోగ్రతలు సాధారణం కంటే 3 నుంచి 4 డిగ్రీల వరకు తగ్గినట్లు అధికారులు వెల్లడించారు. తెలంగాణలోని సంగారెడ్డి జిల్లా కోహిర్‌లో అత్యల్పంగా 5 డిగ్రీల సెంటిగ్రేడ్ ఉష్ణోగ్రత నమోదు కావడం చలి తీవ్రతను స్పష్టంగా చూపుతోంది. ఆదిలాబాద్‌, ఆసీఫాబాద్‌, వికారాబాద్‌, మెదక్‌, కామారెడ్డి జిల్లాల్లోనూ ఉష్ణోగ్రతలు గణనీయంగా పడిపోయాయి.

హైదరాబాద్‌లో సాధారణంగా కనిష్ట ఉష్ణోగ్రతలు 10 నుంచి 12 డిగ్రీల మధ్య ఉండగా, నగర శివారు ప్రాంతాల్లో మాత్రం మరింత తక్కువగా నమోదవుతున్నాయి. ఉదయం వేళల్లో పొగమంచు కారణంగా రహదారులు స్పష్టంగా కనిపించక వాహనదారులు అప్రమత్తంగా ప్రయాణం చేయాల్సిన పరిస్థితి నెలకొంది.

ఆంధ్రప్రదేశ్‌లోని ఏజెన్సీ ప్రాంతాల్లో చలి తీవ్రత మరింత ఎక్కువగా ఉంది. ఉమ్మడి విశాఖపట్నం జిల్లాలోని అరకు, పాడేరు, చింతపల్లి వంటి ప్రాంతాల్లో ఉష్ణోగ్రతలు భారీగా తగ్గాయి. ఉదయం, రాత్రి వేళల్లో దట్టమైన పొగమంచు కురుస్తుండటంతో వాహన రాకపోకలకు తీవ్ర అంతరాయం ఏర్పడుతోంది.

చలి ప్రభావంతో పాలు, కూరగాయల వ్యాపారులు కూడా ఇబ్బందులు ఎదుర్కొంటున్నారు. తెల్లవారుజామున ప్రయాణించే వారు పొగమంచు కారణంగా దారి కనిపించక తీవ్ర ఇబ్బందులు పడుతున్నారు. ముఖ్యంగా ఏజెన్సీ ప్రాంతాల్లో వాతావరణ పరిస్థితులు మరింత కఠినంగా మారాయి.

చలి తీవ్రత దృష్ట్యా చిన్నారులు, వృద్ధులు, శ్వాసకోశ సమస్యలు ఉన్నవారు ప్రత్యేక జాగ్రత్తలు తీసుకోవాలని వైద్యులు సూచిస్తున్నారు. ఈ నెలాఖరు వరకు చలి ఇలానే కొనసాగే అవకాశముందని వాతావరణ శాఖ అధికారులు అంచనా వేస్తున్నారు.