హైదరాబాద్‌లో నెట్‌ఫ్లిక్స్ ఐలైన్ స్టూడియోస్ కార్యాలయాన్ని ప్రారంభించిన సీఎం రేవంత్ రెడ్డి!

తెలంగాణ ముఖ్యమంత్రి రేవంత్ రెడ్డి హైదరాబాద్‌లో నెట్‌ఫ్లిక్స్కు చెందిన ఐలైన్ స్టూడియోస్ కార్యాలయాన్ని ప్రారంభించారు. ఈ కార్యక్రమానికి పరిశ్రమలు మరియు ఐటీ శాఖ మంత్రి దుద్దిళ్ల శ్రీధర్ బాబు, సినీ నటుడు రానా దగ్గుబాటి, ఐలైన్ స్టూడియోస్ సీఈఓ జెఫ్ షాపిరో మరియు తెలంగాణ ఫిల్మ్ డెవలప్‌మెంట్ కార్పొరేషన్ (టీఎఫ్‌డీసీ) చైర్మన్ దిల్ రాజు హాజరయ్యారు. ఈ కార్యాలయం ప్రారంభం ద్వారా హైదరాబాద్ ప్రపంచ స్థాయి మీడియా, ఎంటర్‌టైన్‌మెంట్ రంగానికి ముఖ్య కేంద్రంగా మారుతున్నదని అధికారులు తెలిపారు.

ఈ సందర్భంగా సీఎం మాట్లాడుతూ తాను చిన్నప్పటి నుంచే సినిమాలపై ఆసక్తి కలిగి ఉన్నానని చెప్పారు. కాలక్రమంలో సినిమా రంగంలో భారీ మార్పులు వచ్చాయని, బాహుబలి: ది బిగినింగ్, కల్కి 2898 ఎడీ, ఆర్‌ఆర్‌ఆర్, అరుంధతి వంటి చిత్రాలు అత్యున్నత సాంకేతికతతో రూపొందిన ఉదాహరణలని పేర్కొన్నారు. హైదరాబాద్‌కు నెట్‌ఫ్లిక్స్ రావడం అంటే హాలీవుడ్ వచ్చినట్లేనని వ్యాఖ్యానించిన ఆయన, ఐలైన్ స్టూడియోస్ విస్తరణకు ప్రభుత్వం పూర్తి సహకారం అందిస్తుందని తెలిపారు. ఫ్యూచర్ సిటీ ప్రాంతంలో పెద్ద కార్యాలయాల నిర్మాణానికి అవసరమైన భూమిని ఇవ్వడానికి సిద్ధంగా ఉన్నామని కూడా చెప్పారు.