ఏపీ వీధి వ్యాపారులకు భారీ శుభవార్త.. రూ.30 వేల క్రెడిట్ కార్డ్ పథకం ప్రారంభం

ఆంధ్రప్రదేశ్ ప్రభుత్వం వీధి వ్యాపారులకు మరో కీలక శుభవార్త అందించింది. ఆర్థిక ఇబ్బందులు లేకుండా వ్యాపారం సాగించేందుకు వీలుగా కొత్త పథకాన్ని నేటి నుంచే అమల్లోకి తీసుకొచ్చింది. ఈ పథకం కింద వీధి వ్యాపారులకు బ్యాంకుల ద్వారా రూ.30 వేల పరిమితితో ప్రత్యేక క్రెడిట్ కార్డులు అందించనున్నారు. అధిక వడ్డీకి అప్పులు చేయాల్సిన అవసరం లేకుండా, అత్యవసర సమయంలో వడ్డీ లేకుండా డబ్బులు వినియోగించుకునే అవకాశం కల్పించడమే ఈ పథకం లక్ష్యం. తొలుత దీనిని పైలట్ ప్రాజెక్టుగా తిరుపతి జిల్లాలో అమలు చేస్తుండగా, అర్హులైన సుమారు 7 వేల మంది వీధి వ్యాపారులకు శుక్రవారం క్రెడిట్ కార్డులు పంపిణీ చేయనున్నారు. ఈ కార్డు ఐదేళ్ల పాటు చెల్లుబాటు అవుతుంది.

ఇదే సమయంలో వీధి వ్యాపారుల కోసం అమలవుతున్న పీఎం స్వనిధి పథకం ద్వారా రూ.50 వేల వరకు రుణం పొందే అవకాశమూ ఉంది. ఎటువంటి పూచీకత్తు లేకుండా మూడు విడతలుగా ఈ రుణాలు మంజూరు చేస్తారు. తొలి విడతలో రూ.10 వేలు, సకాలంలో చెల్లిస్తే రెండో విడతలో రూ.20 వేలు, మూడో విడతలో రూ.50 వేల వరకు లోన్ అందిస్తారు. రుణాన్ని సకాలంలో చెల్లించిన వారికి కేవలం 7 శాతం వడ్డీ మాత్రమే వసూలు చేస్తారు. ప్రస్తుతం ఈ పథకం తిరుపతి జిల్లాలో అమల్లో ఉండగా, త్వరలో రాష్ట్రవ్యాప్తంగా విస్తరించనున్నారు. ఈ చర్యలతో వీధి వ్యాపారులకు ఆర్థిక భద్రత పెరిగి, వారి వ్యాపారాలు మరింత స్థిరంగా సాగుతాయని అధికారులు ఆశాభావం వ్యక్తం చేస్తున్నారు.