పైలట్ అవసరం లేకుండా విమానం సేఫ్ ల్యాండింగ్

అత్యవసర పరిస్థితుల్లో విమానయాన భద్రతకు కొత్త మైలురాయిగా నిలిచే ఘటన అమెరికాలో చోటుచేసుకుంది. డెన్వర్ సమీపంలోని Rocky Mountain Metropolitan Airport లో ఒక విమానం పైలట్ జోక్యం లేకుండా పూర్తిగా ఆటోమేటిక్ విధానంలో సురక్షితంగా రన్‌వే పై ల్యాండ్ అయింది.

ఈ ఘటనలో భాగమైనది రెండు ఇంజిన్లతో కూడిన Beechcraft Super King Air 200 విమానం. ల్యాండింగ్ అనంతరం విమానంలో ఉన్న ఇద్దరు వ్యక్తులు ఎలాంటి గాయాలు లేకుండా సురక్షితంగా బయటకు వచ్చారు.

ఈ విమానంలో Garmin అభివృద్ధి చేసిన ఆటోలాండ్ సిస్టమ్ అమర్చబడింది. అత్యవసర పరిస్థితి తలెత్తిన వెంటనే ఈ సిస్టమ్ స్వయంచాలకంగా నియంత్రణ చేపట్టి, సమీప విమానాశ్రయాన్ని గుర్తించి, ఎయిర్ ట్రాఫిక్ కంట్రోల్‌తో ఆటోమేటెడ్ వాయిస్ ద్వారా సంప్రదింపులు జరిపింది.

లైవ్ ఏటీసీ కమ్యూనికేషన్‌ను ప్రసారం చేసే LiveATC.net లో ఈ ఆటోమేటెడ్ వాయిస్ స్పష్టంగా వినిపించింది. సమీపంలోని ఇతర పైలట్లకు అలర్ట్ ఇచ్చిన కొద్ది నిమిషాల్లోనే విమానం రన్‌వే పై సాఫీగా దిగింది. ఈ సందర్భంగా గర్మిన్ సంస్థ స్పందిస్తూ, ఇప్పటికే దాదాపు 1,700 విమానాల్లో ఆటోలాండ్ సిస్టమ్‌ను అమర్చామని, అయితే బీచ్‌క్రాఫ్ట్ సూపర్ కింగ్ ఎయిర్ 200 విమానంలో ఈ వ్యవస్థను అత్యవసర పరిస్థితిలో వినియోగించడం ఇదే తొలిసారి అని వెల్లడించింది.

ఈ ఘటనతో, భవిష్యత్తులో విమానయాన రంగంలో ఆర్టిఫిషియల్ ఇంటెలిజెన్స్, ఆటోమేషన్ ఆధారిత భద్రతా వ్యవస్థలు ఎంత కీలకంగా మారబోతున్నాయో మరోసారి స్పష్టమైంది.