హాలీవుడ్ స్థాయి ప్రమోషన్స్‌తో ‘టాక్సిక్’.. రిలీజ్ వాయిదాపై మేకర్స్ క్లారిటీ!

కేజీఎఫ్ సిరీస్ విజయంతో గ్లోబల్ స్టార్‌గా ఎదిగిన యశ్, ఇప్పుడు భారీ బడ్జెట్ చిత్రం “టాక్సిక్”తో మరోసారి ప్రేక్షకుల ముందుకు రాబోతున్నారు. గీతూ మోహన్ దాస్ దర్శకత్వంలో తెరకెక్కుతున్న ఈ సినిమాపై మొదటి నుంచే భారీ అంచనాలు ఉన్నాయి. ఇటీవల ఈ సినిమా వాయిదా పడుతుందనే వార్తలు సోషల్ మీడియాలో రావడంతో అభిమానులు ఆందోళన చెందారు. అయితే చిత్ర బృందం ఈ వార్తలను ఖండిస్తూ, ప్రకటించినట్టుగానే జూన్ 4న ప్రపంచవ్యాప్తంగా విడుదల అవుతుందని స్పష్టం చేసింది.

రిలీజ్‌కు సమయం దగ్గర పడుతున్న నేపథ్యంలో ప్రమోషన్లు వేగంగా కొనసాగుతున్నాయి. ఈ సినిమాను కేవలం దేశవ్యాప్తంగా కాకుండా ప్రపంచవ్యాప్తంగా విడుదల చేయాలని మేకర్స్ ప్లాన్ చేస్తున్నారు. యశ్ ప్రస్తుతం అమెరికాలో జరుగుతున్న సినీమాకాన్ కార్యక్రమంలో పాల్గొంటూ సినిమాను ప్రచారం చేస్తున్నారు. ఈ చిత్రం కన్నడతో పాటు ఇంగ్లీష్‌లోనూ తెరకెక్కించి, తెలుగు, తమిళ, మలయాళ, హిందీ భాషల్లో విడుదల చేయనున్నారు.

ఈ సినిమా కథ 1940 నుంచి 1970 మధ్య గోవాలో జరిగే గ్యాంగ్ నేపథ్యంపై ఆధారపడి ఉంటుంది. మాదకద్రవ్యాల మాఫియా, గ్యాంగ్ పోరాటాలు ప్రధానంగా ఉంటాయి. నయనతార, కియారా అద్వానీ, హ్యూమా ఖురేషీ, తారా సుతారియా వంటి ప్రముఖులు ఇందులో నటిస్తున్నారు. ఇదే సమయంలో యశ్ “రామాయణం” సినిమాలో రావణుడిగా కూడా నటిస్తున్నారు. భారీ అంచనాలతో వస్తున్న “టాక్సిక్” మరోసారి బాక్సాఫీస్ వద్ద సంచలనం సృష్టించే అవకాశం ఉందని భావిస్తున్నారు.