INCA అవార్డ్స్‌లోనూ ఉత్తమ నటుడిగా ఆ హీరో

నాగ చైతన్య ప్రతిష్టాత్మకమైన INCA అవార్డ్స్ 2026 లో ఉత్తమ నటుడిగా ఎంపికయ్యారు. ‘తండేల్’ సినిమాలో ఆయన నటనకు ఈ గౌరవం దక్కింది. ఈ అవార్డులు దేశంలోని పలు భాషల సినీ పరిశ్రమలను ఒకే వేదికపైకి తీసుకువచ్చి ప్రతిభను గుర్తించడంలో ప్రత్యేక స్థానం కలిగి ఉన్నాయి. రష్మిక మందన్న ‘ది గర్ల్‌ఫ్రెండ్‌’ సినిమాతో ఉత్తమ నటిగా నిలిచారు. అలాగే అనిల్ రావిపూడి ‘సంక్రాంతికి వస్తున్నాం’ చిత్రానికి ఉత్తమ దర్శకుడిగా ఎంపికయ్యారు. అదే సినిమాలో నటించిన మాస్టర్ రేవంత్ ఉత్తమ హాస్యనటుడిగా అవార్డు అందుకున్నారు.

తేజ సజ్జా నటించిన ‘మిరాయ్’ ఉత్తమ చిత్రంగా నిలవడంతో పాటు ఉత్తమ దృశ్య ప్రభావాల విభాగంలో కూడా అవార్డు గెలుచుకుంది. ‘కోర్ట్’ చిత్రానికి రామ్ జగదీష్ ఉత్తమ తొలి దర్శకుడిగా ఎంపికయ్యారు. ఇతర భాషల్లో దుల్కర్ సల్మాన్, సిమ్రాన్, రిషబ్ శెట్టి, నివిన్ పౌలీ, రణవీర్ సింగ్, యామీ గౌతమ్ వంటి ప్రముఖులు అవార్డులు అందుకున్నారు. ఈ అవార్డుల కార్యక్రమం ఈ నెల 16 న ముంబైలో జరగనుంది. రానా దగ్గుబాటి మరియు కరణ్ జోహార్ ఈ వేడుకను నిర్వహించనున్నారు. రేఖ, అల్లు అరవింద్ వంటి ప్రముఖులు కూడా హాజరుకానున్నారు.