అవకాశాల వెనుక చీకటి కోణం- చాందిని రివీల్

టాలీవుడ్ హీరోయిన్ చాందిని చౌదరి సినిమా అవకాశాల పేరుతో మహిళలు ఎదుర్కొనే వేధింపులపై చేసిన వ్యాఖ్యలు చర్చనీయాంశంగా మారాయి. ఓ కార్యక్రమంలో ఆమె తన కెరీర్ ప్రారంభంలో ఎదురైన చేదు అనుభవాన్ని వెల్లడించారు. 2015లో ‘బ్రహ్మోత్సవం’ షూటింగ్ సమయంలో ఓ వ్యక్తి తనను సంప్రదించి ప్రముఖ జ్యువెలరీ బ్రాండ్‌కు బ్రాండ్ అంబాసిడర్ అవకాశం ఇప్పిస్తానని చెప్పాడని తెలిపారు. మొదట తన తల్లి సమక్షంలో మాట్లాడిన ఆ వ్యక్తి, ఆ తర్వాత ఫోన్‌లో తనపై అవమానకరంగా మాట్లాడాడని, అనుచితంగా ప్రవర్తించాడని ఆరోపించారు. తనపై ఒత్తిడి తీసుకురావడంతో తిరస్కరించానని, ఆ తర్వాత పోలీసులకు ఫిర్యాదు చేస్తామని హెచ్చరించినట్లు చెప్పారు.

తన నిర్ణయానికి ప్రతీకారంగా ఆ వ్యక్తి ఇండస్ట్రీలో తనపై ప్రతికూల ప్రచారం చేశాడని చాందిని ఆవేదన వ్యక్తం చేశారు. తనకు పొగరు ఎక్కువని, తనతో పనిచేయడం కష్టమని తప్పుడు ప్రచారం జరిగిందని తెలిపారు. 2024లో అదే వ్యక్తి మళ్లీ ఎదురైనప్పుడు గత ఘటనను గుర్తు చేసి నేరుగా ప్రశ్నించానని చెప్పారు. కెరీర్ ప్రారంభంలో తాను మృదువుగా ఉండేదాన్నని, ఇలాంటి అనుభవాల వల్లే తనను తాను రక్షించుకోవడం నేర్చుకున్నానని చాందిని తెలిపారు.