ఆస్తి వివాదం వేళ అమితాబ్ బచ్చన్ బ్లాగ్ పోస్ట్ వైరల్

బాలీవుడ్ అగ్రనటుడు అమితాబ్ బచ్చన్ తన వ్యక్తిగత బ్లాగ్‌లో చేసిన వ్యాఖ్యలు ఆసక్తికరంగా మారాయి. ఏమీ లేనప్పుడు ఎన్నో కావాలని కోరుకుంటామని, అవన్నీ లభించిన తర్వాత వాటిని ఏం చేసుకోవాలో తెలియక ఆలోచనలో పడతామని ఆయన పేర్కొన్నారు. దేవుడిని కోరుకునేటప్పుడు అన్నీ అడుగుతామని, కానీ ఇంత ఎక్కువగా లభిస్తాయని ఊహించమని తన అభిప్రాయాన్ని పంచుకున్నారు. అలాగే ప్రపంచం మనం చెప్పినట్లు నడుచుకోదని, దాన్ని అందుకోవడానికి ప్రయత్నించకపోతే ఎప్పటికీ వెనుకబడిపోతామని చమత్కరించారు.

ముంబయిలోని అమితాబ్ బచ్చన్ నివాసం ‘జల్సా’ యాజమాన్య హక్కులపై వివాదం కొనసాగుతున్న నేపథ్యంలో ఆయన చేసిన ఈ వ్యాఖ్యలు చర్చనీయాంశంగా మారాయి. ఈ ఇంటిని 1993లో అమితాబ్ భార్య జయా బచ్చన్ పేరు మీద గిఫ్ట్ డీడ్ ద్వారా బదిలీ చేసినట్లు సమాచారం. అయితే, ఈ ఆస్తి గతంలో తన పేరు మీదే ఉందని, తనకు తెలియకుండా లేదా అనుమతి లేకుండా బదిలీ చేశారని అమితాబ్ సోదరుడు అజితాబ్ బచ్చన్ భార్య రమోలా ఆరోపిస్తున్నారు. ఈ వ్యవహారంపై ఆమె ఫిర్యాదు చేయడంతో ఆస్తి యాజమాన్య వివాదం వార్తల్లో నిలిచింది.