పూరీ జగన్నాథ్, విజయ్ సేతుపతి మూవీ షూటింగ్ పూర్తి!

అత్యంత ఆసక్తిని రేపుతున్న పాన్–ఇండియా ప్రాజెక్ట్ #పూరీసేతుపతి చిత్రీకరణ పూర్తయ్యింది. డ్యాషింగ్ డైరెక్టర్ పూరీ జగన్నాథ్ మరియు విభిన్న నటుడు విజయ్ సేతుపతి కలయికలో రూపొందుతున్న ఈ మాస్ యాక్షన్ ఎంటర్టైనర్ చివరి రోజు షూట్‌ ముగిసింది. ఈ సందర్భంగా పూరీ, విజయ్ సేతుపతి, చార్మీ కౌర్‌ల మధ్య ఉన్న ఆప్యాయ క్షణాలను చూపిస్తూ టీమ్ ఒక హృదయాన్ని హత్తుకునే వీడియోను విడుదల చేసింది.

ఈ వీడియోలో విజయ్ సేతుపతి, పూరీ మరియు యూనిట్‌తో పనిచేయడం ఎంత మిస్ అవుతానో భావోద్వేగంగా చెప్పాడు. మొత్తం ప్రయాణం ఎంతో మధురంగా, ఆనందంగా గడిచిందని పేర్కొన్నాడు. పూరీ, చార్మీ కూడా విజయ్‌తో ఏర్పడిన స్నేహం మరియు బాండింగ్‌ని గుర్తుచేసుకున్నారు. ఫేర్‌వెల్ సమయంలో విజయ్ సేతుపతి పూరీ వేసుకున్న జాకెట్‌పై సరదాగా కామెంట్ చేయడం వీడియోకి మరింత అందాన్ని తెచ్చింది.

పూరీ కనెక్ట్స్ బ్యానర్‌పై పూరీ జగన్నాథ్, చార్మీ కౌర్ నిర్మిస్తోన్న ఈ సినిమాను జేబీ మోహన్ పిక్చర్స్‌కి చెందిన జేబీ నారాయణ రావు కొండ్రొల్లా సహనిర్మాతగా చేస్తున్నారు. సంయుక్త హీరోయిన్‌గా నటిస్తుండగా, టబు మరియు దునియా విజయ్ కుమార్ కీలక పాత్రల్లో కనిపించనున్నారు. అర్జున్ రెడ్డి, ఆనిమల్ వంటి చిత్రాలకు సంగీతం అందించిన జాతీయ అవార్డు గ్రహీత హర్షవర్ధన్ రమేశ్వర్ ఈ సినిమాకు మ్యూజిక్ అందిస్తున్నారు. బ్రహ్మాజీ, వి.టీ.వి. గణేష్ కామెడీ రోల్స్‌లో అలరించబోతున్నారు. షూటింగ్ పూర్తయిన నేపథ్యంలో టైటిల్, ఫస్ట్ లుక్‌తో ప్రమోషన్స్ త్వరలో ప్రారంభం కానున్నాయి. ఈ చిత్రం తెలుగు, తమిళం, కన్నడ, మలయాళం, హిందీ భాషల్లో పాన్–ఇండియా రిలీజ్‌కి సిద్ధమవుతోంది.