డీప్‌ఫేక్‌లపై మంచు విష్ణు సీరియస్.. టాలీవుడ్‌లో శాశ్వత వ్యవస్థకు పిలుపు

ఏఐ డీప్‌ఫేక్‌ ఘటనపై మూవీ ఆర్టిస్ట్స్‌ అసోసియేషన్‌ అధ్యక్షుడు మంచు విష్ణు తీవ్ర ఆందోళన వ్యక్తం చేశారు. ఇది ఒక సంఘటనగా మాత్రమే చూడకూడదని, భవిష్యత్తులో ఎదురయ్యే ముప్పులకు హెచ్చరికగా భావించాలని అన్నారు. నటుడు రామ్‌ పోతినేని సూచించినట్లుగా ఆన్‌లైన్‌ గుర్తింపులను ఆధార్‌తో అనుసంధానం చేసి జవాబుదారీతనం తీసుకురావాలన్న ప్రతిపాదనపై చర్చ జరగాల్సిన అవసరం ఉందన్నారు. భావ ప్రకటనా స్వేచ్ఛను గౌరవించాల్సిందేనని, అయితే అనామకత్వాన్ని దుర్వినియోగం చేసి వ్యక్తులను వేధించడం, పరువు తీసేలా ప్రచారం చేయడం లేదా డీప్‌ఫేక్‌లతో నష్టం కలిగించడం సరికాదని పేర్కొన్నారు. సినిమాలు విడుదలకు ముందే లక్ష్యంగా చేసుకుని చేసే సమన్వయంతో కూడిన ప్రతికూల ప్రచారాన్ని విమర్శగా కాకుండా ‘సాబోటేజ్‌’గా చూడాలని వ్యాఖ్యానించారు.

సినిమా విజయాన్ని లేదా వైఫల్యాన్ని ప్రేక్షకులే నిర్ణయించాలని మంచు విష్ణు అన్నారు. నటులు, దర్శకులు, నిర్మాతలపై లక్ష్యిత ప్రచారాలు, ఫ్యాన్‌ గ్రూపుల మధ్య వివాదాలు, నటుల ఫొటోలను ఉపయోగిస్తూ తప్పుడు గుర్తింపులతో పనిచేసే ఖాతాలపై దృష్టి పెట్టాల్సిన అవసరం ఉందన్నారు. ది పారడైజ్‌ చిత్రబృందం విడుదలకు ముందు కోర్టును ఆశ్రయించిన విషయాన్ని కూడా ప్రస్తావించారు. ఏఐ డీప్‌ఫేక్‌లు, వ్యక్తిత్వ దుర్వినియోగం, సమన్వయంతో జరిగే ప్రతికూల ప్రచారాలను ఎదుర్కొనేందుకు తెలుగు ఫిల్మ్‌ ఛాంబర్‌, ప్రొడ్యూసర్స్‌ కౌన్సిల్‌, మూవీ ఆర్టిస్ట్స్‌ అసోసియేషన్‌ తదితర సంస్థలు కలిసి శాశ్వత పరిశ్రమవ్యాప్త వ్యవస్థను ఏర్పాటు చేయాలని ఆయన కోరారు. ప్రతి వారం సినిమాలు పోటీ పడినా, మిగతా సమయాన్ని ఒకరినొకరు దెబ్బతీయడానికి ఉపయోగించకూడదని, చివరికి సినిమా గెలవాలని అన్నారు.