ఇళయరాజా చేతుల మీదుగా ‘మంజనతి’ షూటింగ్‌ ప్రారంభం

తమిళ సినీ పరిశ్రమలో విభిన్నమైన కథాంశాలు, ప్రత్యేకమైన కథనంతో తనదైన ముద్ర వేసుకున్న దర్శకుడు మారి సెల్వరాజ్‌.. ‘మంజనతి’ అనే ఆసక్తికరమైన చిత్రంతో ప్రేక్షకుల ముందుకు రాబోతున్నారు. ఎమోషనల్ అండ్ లేడీ ఓరియంటెడ్ డ్రామాగా తెరకెక్కుతున్న ఈ సినిమాలో ప్రియాంక మోహన్, కాయదు లోహర్ హీరోయిన్లుగా నటిస్తుండగా, కథిర్, పొన్‌వేల్ కీలక పాత్రల్లో కనిపించనున్నారు. ఈ చిత్రానికి సంగీత దిగ్గజం ఇళయరాజా సంగీతం అందిస్తుండగా, ఫార్చ్యూన్ ఎంటర్‌టైన్‌మెంట్స్ బ్యానర్‌పై సుశాంత్ ప్రసాద్ భారీ స్థాయిలో నిర్మిస్తున్నారు.

తాజాగా ‘మంజనతి’ షూటింగ్‌ గ్రాండ్‌గా నిర్వహించిన పూజా కార్యక్రమాలతో అధికారికంగా ప్రారంభమైంది. ఈ వేడుకకు ముఖ్య అతిథిగా హాజరైన ఇళయరాజా క్లాప్ కొట్టి, కెమెరా స్విచ్ ఆన్ చేసి చిత్రీకరణకు శ్రీకారం చుట్టారు. ఈ సందర్భంగా చిత్రబృందం మొత్తం క్రీమ్ అండ్ వైట్ డ్రెస్ కోడ్‌లో క్లాసీగా కనిపించింది. వేడుకకు సంబంధించిన ఫొటోలను మారి సెల్వరాజ్‌ ఎక్స్‌లో పంచుకున్నారు. అలాగే పసుపు రంగు చీర, మెడలో పూలమాలతో ఉన్న ఓ అమ్మాయి చుట్టూ వింత ఆకారాలతో ఉన్న పోస్టర్‌ను విడుదల చేశారు. ఈ పోస్టర్‌ సినిమాపై మరింత ఆసక్తిని పెంచుతోంది.