ఏళ్ల తరబడి ప్రపోజ్ చేశాడు.. ఆ తర్వాత రాఖీ కట్టేశా: అంజలి

యంగ్ హీరోయిన్ అంజలి ప్రస్తుతం తెలుగు, తమిళ చిత్రాల్లో వరుస అవకాశాలతో బిజీగా ఉన్నారు. కోలీవుడ్ స్టార్ విశాల్ స్వీయ దర్శకత్వంలో తెరకెక్కుతున్న ‘మకుటం’ చిత్రంలో ఆమె కీలక పాత్రలో నటిస్తున్నారు. జీవీ ప్రకాష్ కుమార్ సంగీతం అందిస్తున్న ఈ చిత్రాన్ని సూపర్ గుడ్ ఫిల్మ్స్ నిర్మిస్తోంది. ఈ నెలలోనే సినిమా విడుదలయ్యే అవకాశం ఉన్న నేపథ్యంలో ప్రచార కార్యక్రమాల్లో పాల్గొంటున్న అంజలి తాజాగా ఓ ఇంటర్వ్యూలో తన స్కూల్ రోజులలో జరిగిన సరదా సంఘటనను పంచుకున్నారు.

ఏడో తరగతి నుంచి పదో తరగతి వరకు ఒక అబ్బాయి తనకు నిరంతరం ప్రపోజ్ చేస్తూ ఉండేవాడని అంజలి తెలిపారు. మొదట్లో అతడిని పట్టించుకోలేదని, చివరకు అతను ఆగిపోతాడని భావించి రాఖీ కట్టానని చెప్పారు. అయితే ఆ అబ్బాయి రాఖీ తీసి పక్కన పెట్టి సరదాగా స్పందించాడని గుర్తు చేసుకున్నారు. ఆ సంఘటన తర్వాత అతడిని మళ్లీ చూడలేదన్నారు. సినిమా ఇండస్ట్రీలో ఎవరైనా ప్రపోజ్ చేశారా అనే ప్రశ్నకు తెలివిగా సమాధానం ఇస్తూ ఎలాంటి పేర్లు చెప్పనని పేర్కొన్నారు. ప్రస్తుతం తన జీవితంలో అలాంటి ప్రత్యేక వ్యక్తి ఎవరూ లేరని, తాను సింగిల్‌గానే ఉన్నానని స్పష్టం చేశారు.