ఢిల్లీ హైకోర్టు నుంచి రాజ్‌పాల్ యాదవ్‌కు ఊరట !

బాలీవుడ్ నటుడు రాజ్‌పాల్ యాదవ్ చెక్ బౌన్స్ కేసులో ఢిల్లీ హైకోర్టు నుంచి మధ్యంతర బెయిల్ పొందడంతో తిహార్ జైలు నుంచి విడుదలయ్యారు. 13 రోజుల పాటు జైలులో ఉన్న ఆయన వచ్చే నెల 18 వరకు బెయిల్ పొందారు. కోర్టు ఆదేశాల మేరకు ఫిర్యాదుదారుడి ఖాతాలో రూ.1.5 కోట్లు జమ చేయడంతో పాటు తన పాస్‌పోర్ట్‌ను సమర్పించాలని కోర్టు ఆదేశించింది. విడుదల అనంతరం మీడియాతో మాట్లాడిన యాదవ్, తనకు మద్దతు తెలిపిన ప్రజలకు కృతజ్ఞతలు తెలిపారు.

ఈ కేసు 2010 లో ప్రారంభమైన రూ.9 కోట్ల ఆర్థిక వివాదానికి సంబంధించినది. తన సినిమా Ata Pata Paapata  నిర్మాణానికి మురళీ ప్రాజెక్ట్స్ ప్రైవేట్ లిమిటెడ్ నుంచి రూ.5 కోట్లు రుణంగా తీసుకున్నట్లు తెలుస్తోంది. సినిమా బాక్సాఫీస్ వద్ద విఫలమవడంతో అప్పులు పెరిగి, చెల్లింపుల కోసం ఇచ్చిన చెక్కులు బౌన్స్ కావడంతో న్యాయపోరాటం ప్రారంభమైంది. ఈ సమయంలో సల్మాన్ ఖాన్, ప్రియదర్శన్, సోను సూద్, గుర్మీత్ చౌదరి తదితరులు ఆర్థిక సహాయం చేసినట్లు సమాచారం. అయితే బెయిల్ లభించినప్పటికీ కేసు విచారణ కొనసాగనుంది.