సోడా నుంచి స్వీట్ డ్రింక్స్ వరకు.. కడుపు క్యాన్సర్‌పై కొత్త అధ్యయనం

మాస్ జనరల్ బ్రిగమ్ క్యాన్సర్ ఇన్‌స్టిట్యూట్ పరిశోధకులు నిర్వహించిన తాజా అధ్యయనంలో చక్కెర కలిగిన పానీయాల తరచు వినియోగం, కడుపు క్యాన్సర్ ముప్పు మధ్య సంబంధం ఉన్నట్లు గుర్తించారు. నర్స్‌స్ హెల్త్ స్టడీ, హెల్త్ ప్రొఫెషనల్స్ ఫాలో-అప్ స్టడీకి చెందిన 1,12,284 మంది డేటాను పరిశీలించారు. దశాబ్దాల పాటు సాగిన ఫాలో-అప్‌లో 278 మందికి కడుపు క్యాన్సర్ నిర్ధారణ అయింది. రోజుకు కనీసం ఒక సర్వింగ్ చక్కెర పానీయం తీసుకున్నవారిలో నెలకు ఒకసారి కంటే తక్కువగా తీసుకున్నవారితో పోలిస్తే కడుపు క్యాన్సర్ ముప్పు 2.45 రెట్లు ఎక్కువగా కనిపించింది. మహిళల్లో ఈ సంబంధం మరింత ఎక్కువగా నమోదైంది.

కృత్రిమ స్వీటెనర్లతో కూడిన పానీయాలు, ఫ్రక్టోజ్ వినియోగం, హెచ్. పైలోరీ ఇన్‌ఫెక్షన్ వంటి అంశాలను కూడా పరిశోధకులు పరిశీలించారు. కృత్రిమంగా తీపి చేసిన పానీయాలకు కడుపు క్యాన్సర్‌తో గణనీయమైన సంబంధం కనిపించలేదు. మరోవైపు, అధిక ఫ్రక్టోజ్ వినియోగం కడుపు క్యాన్సర్ ఎక్కువగా నమోదవడంతో సంబంధం ఉన్నట్లు గుర్తించారు. అయితే ఇది పరిశీలనాత్మక అధ్యయనం కావడంతో చక్కెర పానీయాలే నేరుగా క్యాన్సర్‌కు కారణమవుతాయని నిర్ధారించలేమని పరిశోధకులు స్పష్టం చేశారు. హెచ్. పైలోరీ స్థితి, కుటుంబ చరిత్రకు సంబంధించిన పరిమిత సమాచారం, అధ్యయనంలో ఎక్కువ మంది తెల్లజాతికి చెందినవారే ఉండటం వంటి పరిమితులను కూడా వారు పేర్కొన్నారు.