గూగుల్ సీఈఓ సుందర్ పిచాయ్ జీవనశైలి ప్రత్యేకత ఇదే!

గూగుల్ సీఈఓ సుందర్ పిచాయ్ తన సాధారణ జీవనశైలి, క్రమబద్ధమైన దినచర్యతో పలువురి దృష్టిని ఆకర్షిస్తున్నారు. గత 15 ఏళ్లుగా దాదాపు ఒకే రకమైన అల్పాహారాన్ని తీసుకుంటున్నట్లు పలు కథనాల్లో పేర్కొంటున్నారు. ఉదయం గుడ్లు, టోస్ట్ చేసిన బ్రెడ్‌తో పాటు ఒక కప్పు టీ తాగడం ఆయన అలవాటుగా చెబుతారు. ప్రతిరోజూ ఏం తినాలనే ఆలోచనకు ఎక్కువ సమయం కేటాయించకుండా, ముఖ్యమైన పనులపై దృష్టి పెట్టేందుకు ఈ అలవాటు ఉపయోగపడుతుందని సమాచారం. ఆయన సాధారణంగా ఉదయం 6.45 నుంచి 7.30 గంటల మధ్య నిద్రలేచి, ప్రపంచ పరిణామాల గురించి తెలుసుకోవడానికి వార్తాపత్రికలు చదువుతారని చెబుతారు. వాటిలో వాల్ స్ట్రీట్ జర్నల్ కూడా ఒకటిగా పేర్కొంటున్నారు.

ఎంత బిజీగా ఉన్నప్పటికీ సుందర్ పిచాయ్ నిద్ర, ఆరోగ్యానికి ప్రాధాన్యత ఇస్తారని సమాచారం. రోజుకు సుమారు 6.5 నుంచి 7 గంటల నిద్ర పొందేలా చూసుకుంటారు. వ్యాయామం కోసం ప్రత్యేకంగా సమయం కేటాయించే ఆయన, వారాంతాల్లో వాకింగ్, పర్వత ప్రాంతాల్లో హైకింగ్ చేయడానికి ఆసక్తి చూపుతారు. వీటితో పాటు సైక్లింగ్, ఇతర వర్కవుట్లను కూడా తన సమయానికి అనుగుణంగా దినచర్యలో చేర్చుకుంటారు. సరళమైన ఆహారపు అలవాట్లు, తగినంత విశ్రాంతి, క్రమం తప్పని వ్యాయామం ద్వారా వృత్తిపరమైన బాధ్యతలు, వ్యక్తిగత ఆరోగ్యం మధ్య సమతుల్యత పాటిస్తున్నట్లు ఆయన జీవనశైలి తెలియజేస్తోంది.