ఔటర్ రింగ్ రోడ్డుపై ఘోర ప్రమాదం.. లారీని ఢీకొన్న ఆటో, ముగ్గురు మృతి

రంగారెడ్డి జిల్లా రాజేంద్రనగర్ పోలీస్ స్టేషన్ పరిధిలోని తెలంగాణ రాష్ట్ర పోలీస్ అకాడమీ సమీపంలో ఔటర్ రింగ్ రోడ్డుపై ఘోర రోడ్డు ప్రమాదం జరిగింది. ఈ ఘటనలో ముగ్గురు ప్రాణాలు కోల్పోగా, మరో ఇద్దరు తీవ్రంగా గాయపడ్డారు. ముచింతల్‌లో చెట్లు నాటే పనికి వెళ్లి తిరిగి మొయినాబాద్ వైపు వస్తుండగా ఈ ప్రమాదం చోటుచేసుకుంది.

పోలీసులు తెలిపిన వివరాల ప్రకారం.. అప్పా జంక్షన్ వద్ద ఓఆర్ఆర్ నుంచి బయటకు వస్తున్న సమయంలో ముందు వెళ్తున్న లారీని ఆటో వెనుక నుంచి బలంగా ఢీకొట్టింది. ఈ ప్రమాదంలో ఆటోలో ప్రయాణిస్తున్న సురేశ్, పెంటయ్య, లింగరాజు శెట్టి అక్కడికక్కడే మృతిచెందారు. ప్రమాదం జరిగిన సమయంలో ఆటోలో మొత్తం 15 మంది ఉన్నట్లు సమాచారం. సమాచారం అందుకున్న రాజేంద్రనగర్ పోలీసులు ఘటనా స్థలానికి చేరుకుని సహాయక చర్యలు చేపట్టారు. కేసు నమోదు చేసి ప్రమాదానికి గల కారణాలపై దర్యాప్తు చేస్తున్నారు.