కరీనా ప్రెగ్నెన్సీపై వైరల్‌ టాక్‌.. నిజమేంటి?

బాలీవుడ్‌ స్టార్‌ హీరోయిన్‌ కరీనా కపూర్‌ మూడోసారి తల్లి కాబోతున్నారంటూ గత కొన్ని రోజులుగా ప్రచారం జరుగుతోంది. ఇటీవల ఆమె బయట కనిపించిన ఓ వీడియోలో బేబీ బంప్‌ ఉన్నట్లుగా కనిపించడంతో ఈ వార్తలకు మరింత ఊతమిచ్చింది. అయితే కరీనా కపూర్‌ టీమ్‌ ఈ ప్రచారాన్ని ఖండిస్తూ స్పష్టత ఇచ్చింది. ఇందులో ఎలాంటి నిజం లేదని, తప్పుడు పుకార్లను ప్రచారం చేయవద్దని కోరింది. మరోవైపు సైఫ్‌ అలీ ఖాన్‌ సోదరి సబా పటౌడీ కూడా ఈ వ్యవహారంపై స్పందించారు. కరీనా ఫోటోను షేర్‌ చేసిన ఆమె, కెమెరా యాంగిల్‌ కారణంగానే ఈ అనుమానాలు వచ్చాయని తెలిపారు.

కరీనా ఎయిర్‌పోర్ట్‌ నుంచి వచ్చినప్పుడు చాలా స్లిమ్‌గా, ఫిట్‌గా కనిపించారని, జిమ్‌ బయట కూడా అదే విధంగా కనిపించారని సబా పటౌడీ పేర్కొన్నారు. కాబట్టి కరీనా మూడోసారి గర్భవతి అనే ప్రచారంలో నిజం లేదని ఆమె స్పష్టం చేశారు. అంతేకాకుండా, కరీనాను కాకుండా తన సొంత చెల్లెలు సోహా అలీ ఖాన్‌ను రెండో బిడ్డను కనాలని ఒప్పించేందుకు ప్రయత్నిస్తున్నానంటూ సరదాగా వ్యాఖ్యానించారు. ఇతరుల వ్యక్తిగత విషయాలపై ఊహాగానాలు చేయకుండా వారి గోప్యతను గౌరవించాలని సబా కోరారు. దీంతో కరీనా ప్రెగ్నెన్సీపై వస్తున్న ప్రచారానికి తెరపడింది.