శేఖర్ కమ్ముల డైరెక్షన్ లో అకీరా నందన్ గ్రాండ్ లాంచ్‌?

మెగా కాంపౌండ్ నుంచి మరో కొత్త హీరో రావాలని అభిమానులు ఎంతో ఆసక్తిగా ఎదురుచూస్తున్నారు. పవన్ కళ్యాణ్ ప్రస్తుతం పూర్తిగా రాజకీయాల్లో బిజీగా ఉండటంతో, ఆయన సినిమా ప్రాజెక్టులపై కూడా అనేక ఊహాగానాలు వినిపిస్తున్నాయి. ఈ క్రమంలోనే ఇటీవల ‘ఓజీ’ సినిమాలో అకీరా నందన్ స్పెషల్ రోల్ చేస్తున్నాడన్న వార్తలు సోషల్ మీడియాలో చక్కర్లు కొట్టాయి. అయితే, అవి పూర్తిగా ఫేక్ అని తేలింది. కొద్ది సేపు అభిమానులను ఉత్సాహపరిచిన ఈ వార్తలు నిజం కాదని స్పష్టమైంది.

ఇదిలా ఉండగా, పవన్ కళ్యాణ్ సినిమాలకంటే ఇప్పుడు ఆయన కుమారుడు అకీరా నందన్ ఎంట్రీ పైనే ఎక్కువ చర్చ జరుగుతోంది. అకీరా తన ఫిజిక్, లుక్, మేనరిజమ్స్‌తో ఇప్పటికే అభిమానులను ఆకట్టుకుంటున్నాడు. పవన్‌ను పోలిన బాడీ లాంగ్వేజ్, ఆరడుగుల ఎత్తు, మ్యూజిక్‌పై ఆసక్తి కారణంగా అతనిపై భారీ అంచనాలు ఏర్పడ్డాయి. తాజాగా వినిపిస్తున్న సమాచారం ప్రకారం, అకీరా నందన్‌ను దర్శకుడు శేఖర్ కమ్ముల దర్శకత్వంలో లాంచ్ చేయాలనే ఆలోచనలో పవన్ కళ్యాణ్ ఉన్నారట. మాస్ సినిమాలకంటే సహజమైన నటనకు ప్రాధాన్యం ఇచ్చే కథతో అకీరాను పరిచయం చేయాలన్నదే ఆయన లక్ష్యమని టాక్.

అకీరా కూడా కేవలం స్టార్ కిడ్‌గా కాకుండా తన సొంత ప్రతిభతో ముందుకు రావాలని భావిస్తున్నాడని సమాచారం. ఇప్పటికే విదేశాల్లో నటనకు సంబంధించిన కోర్సులు పూర్తి చేసిన అకీరా, మార్షల్ ఆర్ట్స్‌తో పాటు సంగీతంలోనూ శిక్షణ పొందాడు. ముఖ్యంగా మ్యూజిక్‌పై అతనికి ఎక్కువ ఆసక్తి ఉందని, సినిమాల కంటే సంగీత రంగంలోనే కెరీర్ చేయాలన్న ఆలోచన కూడా ఉందన్న ప్రచారం జరుగుతోంది. ఈ కారణంగానే అకీరా సినిమా ఎంట్రీపై ఇంకా స్పష్టత రాలేదని ఇండస్ట్రీ వర్గాలు చెబుతున్నాయి.