‘బ్లడీ రోమియో’లో నాని సరసన హీరోయిన్ ఫిక్స్‌.. ఎవరంటే?

టాలీవుడ్‌లో విభిన్న కథలను ఎంచుకుంటూ తనకంటూ ప్రత్యేక గుర్తింపు తెచ్చుకున్న హీరో నాని, ‘ఓజీ’ ఫేమ్‌ దర్శకుడు సుజిత్‌తో కలిసి ‘బ్లడీ రోమియో’ అనే భారీ యాక్షన్‌ ఎంటర్‌టైనర్‌ చేయనున్నట్లు ఇప్పటికే ప్రచారం జరుగుతోంది. ప్రస్తుతం ఈ చిత్రానికి సంబంధించిన నటీనటుల ఎంపిక ప్రక్రియ కొనసాగుతున్నట్లు సినీ వర్గాల సమాచారం. తాజా సమాచారం ప్రకారం నాని సరసన కథానాయికగా యువ నటి ప్రీతి ముకుందన్‌ను మేకర్స్‌ ఎంపిక చేసినట్లు తెలుస్తోంది. మరో కీలక హీరోయిన్‌ పాత్ర కోసం మీనాక్షి చౌదరితో చర్చలు జరుగుతున్నట్లు సమాచారం.

స్టైలిష్‌ యాక్షన్‌ ఎంటర్‌టైనర్‌గా ఈ చిత్రాన్ని తెరకెక్కించేందుకు సుజిత్‌ సన్నాహాలు చేస్తున్నట్లు తెలుస్తోంది. ఇప్పటికే విడుదలైన కామిక్‌ టీజర్‌ సినిమాపై ఆసక్తిని పెంచింది. భారీ బడ్జెట్‌తో అత్యున్నత సాంకేతిక నిపుణుల సహకారంతో ఈ చిత్రాన్ని రూపొందించనున్నట్లు సమాచారం. నాని తన పాత్ర కోసం ప్రత్యేక మేకోవర్‌ చేస్తున్నట్లు తెలుస్తోంది. రెగ్యులర్‌ షూటింగ్‌ త్వరలో ప్రారంభం కానుందని, ఈ సినిమాకు సంబంధించిన అధికారిక వివరాలు త్వరలో వెల్లడయ్యే అవకాశం ఉందని సినీ వర్గాలు చెబుతున్నాయి.