జయశంకర్ విగ్రహానికి అనుమతి ఇవ్వాలి - కవిత

తెలంగాణ రాష్ట్ర సాధనకు జీవితాంతం కృషి చేసిన ప్రొఫెసర్ కొత్తపల్లి జయశంకర్‌కు హైదరాబాద్‌లో అధికారికంగా కాంస్య విగ్రహం ఏర్పాటు చేయాలని బీఆర్‌ఎస్ నాయకురాలు కవిత కోరారు. తెలంగాణ ఎదుర్కొంటున్న అనేక సమస్యలకు ప్రత్యేక రాష్ట్రమే పరిష్కారమని విశ్వసించి పోరాడిన మహనీయుడైన జయశంకర్‌కు రాష్ట్రం ఏర్పడి 12 సంవత్సరాలు గడిచినా అధికారిక విగ్రహం లేకపోవడం బాధాకరమని ఆమె సామాజిక మాధ్యమ వేదికలో పేర్కొన్నారు.

ట్యాంక్‌బండ్‌పై జయశంకర్ విగ్రహాన్ని ఏర్పాటు చేసేందుకు తెలంగాణ జాగృతి సంస్థకు అనుమతి ఇవ్వాలని ఆమె ప్రభుత్వాన్ని కోరారు. జయశంకర్ జయంతి అయిన ఆగస్టు 6 నాటికి విగ్రహ ఏర్పాట్లు పూర్తి అయ్యేలా చర్యలు తీసుకోవాలని విజ్ఞప్తి చేశారు. అలాగే విగ్రహ ప్రాంగణం నిర్వహణతో పాటు పచ్చదనం పరిరక్షణ బాధ్యతను కూడా తెలంగాణ జాగృతి సంస్థ చేపడుతుందని తెలిపారు.