ఆదిలాబాద్‌ రిమ్స్‌ బాధిత కుటుంబాలకు ప్రభుత్వం అండ

ఆదిలాబాద్‌ రిమ్స్‌లో జరిగిన అగ్ని ప్రమాద ఘటనలో మృతి చెందిన చిన్నారుల కుటుంబాలకు ఒక్కొక్కరికి రూ.5 లక్షల చొప్పున ఎక్స్‌గ్రేషియా అందించాలని తెలంగాణ ప్రభుత్వం నిర్ణయించింది. ముఖ్యమంత్రి రేవంత్‌రెడ్డి ఆదేశాల మేరకు ఈ పరిహారం అందించనున్నట్లు ఆరోగ్యశాఖ మంత్రి దామోదర్‌ రాజనర్సింహ తెలిపారు. ఆదిలాబాద్‌లోని వివిధ ఆస్పత్రుల్లో చికిత్స పొందుతున్న చిన్నారుల ఆరోగ్య పరిస్థితిపై అధికారులను అడిగి మంత్రి వివరాలు తెలుసుకున్నారు. అవసరమైతే వారిని హైదరాబాద్‌లోని పెద్ద ఆస్పత్రులకు తరలించి మెరుగైన వైద్యం అందించాలని ఆదేశించారు.

రిమ్స్‌లో 150 పడకల మాతా శిశు ఆరోగ్య కేంద్రం నిర్మాణ పనులను యుద్ధప్రాతిపదికన ప్రారంభించనున్నట్లు మంత్రి వెల్లడించారు. అత్యాధునిక వైద్య సదుపాయాలతో ఈ కేంద్రాన్ని వీలైనంత త్వరగా అందుబాటులోకి తీసుకువస్తామని చెప్పారు. అగ్ని ప్రమాదం నేపథ్యంలో ఆస్పత్రిలో భద్రతా చర్యలు, మౌలిక వసతులపై సమీక్ష కొనసాగుతోంది.