ఐపీఎల్‌ 2027 వేలం వేదికను ప్రకటించిన బీసీసీఐ

ఇండియన్ ప్రీమియర్ లీగ్ (ఐపీఎల్)-2027 వేలానికి సంబంధించి బీసీసీఐ కీలక ప్రకటన చేసింది. ఈ ఏడాది వేలం స్వదేశంలోనే నిర్వహించనున్నట్లు బీసీసీఐ కార్యదర్శి దేవజిత్ సైకియా వెల్లడించారు. డిసెంబరులో గోవా వేదికగా ఐపీఎల్-2027 వేలం జరుగుతుందని ఆయన తెలిపారు. గత మూడు సీజన్లలో వేలాన్ని సౌదీ అరేబియా, దుబాయ్, అబుదాబి వంటి విదేశీ వేదికల్లో నిర్వహించిన నేపథ్యంలో ఈసారి భారత్‌లోనే ఆక్షన్ నిర్వహించాలని నిర్ణయించినట్లు పేర్కొన్నారు.

మరోవైపు వాతావరణ పరిస్థితుల కారణంగా భారత్-ఎ, ఆస్ట్రేలియా-ఎ మహిళల జట్ల మధ్య సెప్టెంబర్ 29 నుంచి అక్టోబర్ 2 వరకు జరగాల్సిన మల్టీ డే మ్యాచ్ వేదికను ధర్మశాల నుంచి మొహాలికి మార్చినట్లు సైకియా తెలిపారు. ధర్మశాలలో భారీ వర్షపాతం కారణంగా మ్యాచ్ నిర్వహణకు అనుకూల పరిస్థితులు లేవని, అందుకే మొహాలిని ప్రత్యామ్నాయ వేదికగా ఎంపిక చేసినట్లు వివరించారు.