రైతులకు గుడ్‌న్యూస్...సన్న వరి సాగుకు తెలంగాణ ప్రభుత్వం ప్రోత్సాహం

తెలంగాణ రాష్ట్ర ప్రభుత్వం సన్నరకం వరి సాగును ప్రోత్సహిస్తూ రైతులకు క్వింటాలుకు రూ.500 బోనస్ అందిస్తోంది. గతంలో 33 రకాల సన్నాలకు బోనస్ చెల్లించగా, ఈ సీజన్ నుంచి కేవలం ఏడు రకాలకే పరిమితం చేసింది. అధిక దిగుబడి, మార్కెట్‌లో డిమాండ్ ఉన్న రకాల సాగును ప్రోత్సహించేందుకే ఈ నిర్ణయం తీసుకున్నట్లు వ్యవసాయ శాఖ అధికారులు తెలిపారు. రైతులకు అవగాహన కల్పించేందుకు విత్తన మేళాలు నిర్వహిస్తున్నారు.

బీపీటీ-5204, ఆర్‌ఎన్‌ఆర్-15048, కేఎన్‌ఎం-1638, జైశ్రీరామ్, హెచ్‌ఎంటీ సోనా, వరంగల్-44, కేఎన్‌ఎం-7715 రకాలకు మాత్రమే బోనస్ వర్తిస్తుంది. 2024లో 70 శాతం సన్న వరి సాగుకు రూ.105 కోట్ల బోనస్ చెల్లించగా, 2025లో 85 శాతానికి పెరిగి రూ.130 కోట్లకు చేరింది. ప్రతిపక్షాలు విమర్శిస్తున్నప్పటికీ, ప్రభుత్వం నాణ్యమైన సాగును ప్రోత్సహిస్తున్నట్లు పేర్కొంది.