భారత్ ఆతిథ్యంపై విదేశీయురాలి ప్రశంసలు

జేన్ అనే విదేశీయురాలు తన ఇన్‌స్టాగ్రామ్ ఖాతా ‘జేన్ కీ ఖోజ్’లో భారత్‌లో తనకు ఎదురైన ఆతిథ్య అనుభవాలను పంచుకున్నారు. పర్యాటకుల నుంచి సాధారణంగా ఎక్కువ ధరలు వసూలు చేస్తారనే అభిప్రాయానికి తన అనుభవం భిన్నంగా ఉందని తెలిపారు. అనేక సందర్భాల్లో సాధారణ ధర కంటే తక్కువగానే చెల్లించాల్సి వచ్చిందని చెప్పారు. ఓ స్థానిక టీ విక్రేత తాను అతిథినని భావించి ఉద్దేశపూర్వకంగా తక్కువ ధర తీసుకున్నారని తర్వాత తెలుసుకున్నట్లు పేర్కొన్నారు. కొన్ని రెస్టారెంట్లలో ‘వెల్‌కమ్ టు ఇండియా’ అంటూ ఉచితంగా స్వీట్లు కూడా ఇచ్చారని తెలిపారు.

భారత్‌లోని ఆతిథ్యం కేవలం తక్కువ ధరలు, ఉచిత ఆహారానికే పరిమితం కాలేదని జేన్ చెప్పారు. పలువురు అపరిచితులు తమ ఇళ్లకు భోజనానికి ఆహ్వానించారని, కుటుంబ వివాహాలకు తీసుకెళ్లారని, బస చేసేందుకు స్థలం కూడా కల్పించారని తెలిపారు. తన తొలి పర్యటనలో ఎక్కువగా భారతీయ కుటుంబాలతోనే ఉన్నానని, వారు తదుపరి నగరాల్లోని తమ బంధువులు, స్నేహితులతో తనను పరిచయం చేశారని చెప్పారు. ఆటో రిక్షా ప్రయాణాల్లో కొన్నిసార్లు ఎక్కువ వసూలు చేసే అవకాశం ఉన్నప్పటికీ, తనకు మాత్రం ఎక్కువగా తక్కువ ధరలు, ఆత్మీయతే ఎదురయ్యాయని పేర్కొన్నారు. ‘భారతదేశంలో అండర్‌ఛార్జింగ్ వర్సెస్ ఓవర్‌ఛార్జింగ్’ పేరుతో ఆమె చేసిన వీడియోకు సోషల్ మీడియాలో మంచి స్పందన లభించింది.