చంచల్‌గూడ జైలు సూపరింటెండెంట్‌పై ఆరోపణలు నిరాధారం.. జైళ్ల శాఖ క్లారిటీ

చంచల్‌గూడ జైలు సూపరింటెండెంట్‌పై హైదరాబాద్ ఎంపీ అసదుద్దీన్ ఓవైసీ చేసిన ఆరోపణలను తెలంగాణ జైళ్ల శాఖ తీవ్రంగా ఖండించింది. రౌడీషీటర్ నుంచి జైలు అధికారి లంచం తీసుకుని బెయిల్ ఇప్పించారన్న ఆరోపణలు నిరాధారమని స్పష్టం చేసింది. ఈ ఆరోపణలపై జైళ్ల శాఖ అధికారికంగా వివరణ ఇచ్చింది.

బెయిల్ మంజూరు చేయడం జైలు అధికారుల పరిధిలోని అంశం కాదని తెలంగాణ జైళ్ల శాఖ స్పష్టం చేసింది. బెయిల్ ఇవ్వాలా లేదా అనే నిర్ణయం పూర్తిగా సంబంధిత న్యాయస్థానాల పరిధిలో ఉంటుందని తెలిపింది. జైలు అధికారులు కోర్టు ఆదేశాల మేరకే తదుపరి చర్యలు తీసుకుంటారని పేర్కొంది. చంచల్‌గూడ జైలు అధికారులపై వచ్చిన ఆరోపణల నేపథ్యంలో జైళ్ల శాఖ ఈ వివరణ ఇచ్చింది.