ఏపీ బీపీసీఎల్ రిఫైనరీకి గ్రీన్ సిగ్నల్.. పర్యావరణ అనుమతులు మంజూరు

ఆంధ్రప్రదేశ్‌లో ప్రతిష్ఠాత్మకంగా చేపట్టనున్న బీపీసీఎల్ రిఫైనరీ ప్రాజెక్ట్‌కు పర్యావరణ అనుమతులు లభించాయి. దీంతో రూ.లక్ష కోట్లకు పైగా అంచనా వ్యయంతో చేపట్టిన ఈ భారీ ప్రాజెక్ట్ ముందుకు సాగేందుకు కీలక మార్గం సుగమమైంది. రామాయపట్నం సమీపంలో సుమారు 5,200 ఎకరాల విస్తీర్ణంలో రిఫైనరీని ఏర్పాటు చేయనున్నారు.

ఏడాదికి 9 మిలియన్ మెట్రిక్ టన్నుల రిఫైనింగ్ సామర్థ్యంతో ఈ ప్లాంట్‌ను అభివృద్ధి చేయనున్నారు. ఇందులో పెట్రోల్, డీజిల్‌తో పాటు వివిధ పెట్రోకెమికల్ ఉత్పత్తులను తయారు చేయనున్నారు. ఈ ప్రాజెక్ట్ ద్వారా రాష్ట్ర పారిశ్రామిక, ఇంధన రంగాలకు మరింత ఊతం లభించే అవకాశం ఉంది. పర్యావరణ పరిరక్షణలో భాగంగా ప్రాజెక్ట్ పరిధిలో 30 శాతం ప్రాంతాన్ని గ్రీన్ బెల్ట్‌గా అభివృద్ధి చేయాలని బీపీసీఎల్ ప్రణాళిక రూపొందించింది.