ఏపీ బీసీ రిజర్వేషన్లపై సుప్రీంకోర్టును ఆశ్రయించిన ప్రభుత్వం

ఆంధ్రప్రదేశ్‌ స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పిస్తూ ప్రభుత్వం జారీ చేసిన జీవోలు 105, 1065ను హైకోర్టు కొట్టేయడాన్ని సవాల్ చేస్తూ రాష్ట్ర ప్రభుత్వం సుప్రీంకోర్టును ఆశ్రయించింది. రిజర్వేషన్లపై 50 శాతం పరిమితి అన్ని సందర్భాల్లోనూ తప్పనిసరి కాదని, సమకాలీనంగా సేకరించిన సమగ్ర డేటా ఆధారంగా అవసరమైతే ఆ పరిమితిని మించవచ్చని గతంలో సుప్రీంకోర్టు తీర్పులు స్పష్టం చేశాయని ప్రభుత్వం తన పిటిషన్‌లో పేర్కొంది. గ్రామీణ స్థానిక సంస్థల్లో మొత్తం రిజర్వేషన్లు 61.08 శాతానికి చేరుతున్నప్పటికీ, పట్టణ స్థానిక సంస్థల్లో అవి 49.24 శాతానికే పరిమితమవుతున్నాయని వివరించింది.

2025 డిసెంబరు నుంచి నిర్వహించిన సమగ్ర కుటుంబ సర్వేలో రాష్ట్ర జనాభా, సామాజిక, ఆర్థిక, విద్య, ఉద్యోగ తదితర అంశాలకు సంబంధించిన 39 రకాల వివరాలను సేకరించినట్లు ప్రభుత్వం తెలిపింది. ఈ డేటా ప్రకారం రాష్ట్రంలో బీసీల జనాభా సుమారు 50.42 శాతంగా ఉందని, గ్రామీణ ప్రాంతాల్లో 48.84 శాతం, పట్టణ ప్రాంతాల్లో 54.35 శాతంగా ఉన్నట్లు వెల్లడించింది. ఈ వివరాలను స్థానిక సంస్థల ద్వారా ధ్రువీకరించినప్పటికీ, హైకోర్టు డేటాను సమగ్రంగా పరిశీలించకుండా 50 శాతం పరిమితి ఆధారంగా జీవోలను కొట్టేసిందని ప్రభుత్వం వాదించింది. కె.కృష్ణమూర్తి, వికాస్‌ కిషన్‌రావ్‌ గావ్లీ, సురేష్‌ మహాజన్, బిర్రు ప్రతాప్‌రెడ్డి తదితర కేసుల్లోని తీర్పులను కూడా ప్రభుత్వం ప్రస్తావించింది.