

ఇరాన్పై సైనిక చర్యలకు సిద్ధమవుతున్నట్లు వార్తలు వస్తున్న అమెరికా అధ్యక్షుడు డొనాల్డ్ ట్రంప్కు ఓ కీలకమైన వస్త్రం కొరత సమస్యగా మారినట్లు కథనాలు వెల్లడిస్తున్నాయి. పేట్రియాట్ క్షిపణుల తయారీలో ఉపయోగించే ప్రత్యేకమైన ఫ్యాబ్రిక్ అందుబాటులో లేకపోవడం అమెరికా రక్షణ వ్యవస్థపై ప్రభావం చూపుతున్నట్లు సమాచారం. టెహ్రాన్పై దాడులు చేసే సామర్థ్యం అమెరికాకు ఉన్నప్పటికీ, ప్రతిగా ఇరాన్ ప్రయోగించే క్షిపణులు, డ్రోన్లను అడ్డుకోవడంలో ఇబ్బందులు ఎదురయ్యే పరిస్థితి నెలకొన్నట్లు తెలుస్తోంది. అమెరికా రక్షణ వ్యవస్థలో కీలకమైన పేట్రియాట్ క్షిపణుల నిల్వలు తగ్గిపోతుండటంపై పెంటగాన్ వర్గాలు ఆందోళన వ్యక్తం చేస్తున్నట్లు వార్తలు వస్తున్నాయి. గల్ఫ్ దేశాల్లోని అమెరికా సైనిక స్థావరాల భద్రతపైనా ఈ పరిణామాలు ప్రభావం చూపే అవకాశం ఉందని అంచనా వేస్తున్నారు.
ఈ సమస్యకు ప్రధాన కారణంగా రేకార్బ్ సీ2బీ (Raycarb C2B) అనే ప్రత్యేకమైన కార్బనైజ్డ్ రేయాన్ ఫ్యాబ్రిక్ కొరతను పేర్కొంటున్నారు. పేట్రియాట్ ప్యాక్-3 క్షిపణుల రాకెట్ మోటార్లలో ఈ వస్త్రాన్ని ఉపయోగిస్తారు. క్షిపణిని ప్రయోగించినప్పుడు నాజిల్స్ అత్యధిక ఉష్ణోగ్రతలకు గురవుతాయి. అలాంటి పరిస్థితుల్లో కీలక భాగాలు దెబ్బతినకుండా ఈ ప్రత్యేక వస్త్రం రక్షణ కల్పిస్తుంది. ఫ్రాన్స్కు చెందిన ఏరియన్ గ్రూప్ ఈ ఫ్యాబ్రిక్ను తయారు చేసి అమెరికాలోని పార్క్ ఏరోస్పేస్కు సరఫరా చేస్తుంది. అక్కడ ప్రత్యేక ప్రక్రియల ద్వారా దీనిని రాకెట్ పరికరాల్లో వినియోగించేందుకు సిద్ధం చేస్తారు. పేట్రియాట్ క్షిపణుల మోటార్లకు అవసరమైన ప్రమాణాలను ప్రస్తుతం ఈ సంస్థ తయారు చేసే వస్త్రమే అందుకుంటున్నట్లు కథనాలు పేర్కొంటున్నాయి.
ఈ ప్రత్యేక వస్త్రం తయారీ ప్రక్రియ కూడా చాలా క్లిష్టమైనది. ఒక రకమైన కలప గుజ్జు నుంచి ప్రత్యేక రసాయనాల సాయంతో రేయాన్ దారాలను తయారు చేస్తారు. ఈ ప్రక్రియలో కొంత భాగం థాయ్లాండ్కు చెందిన కంపెనీ నిర్వహిస్తున్న చెక్ రిపబ్లిక్ ఫ్యాక్టరీలో జరుగుతుంది. అనంతరం ఫ్రాన్స్లోని ఏరియన్ గ్రూప్ ఈ దారాలను వస్త్రంగా నేసి, ప్రత్యేక కొలిమిలో సుమారు 1,500 డిగ్రీల సెల్సియస్ ఉష్ణోగ్రత వద్ద వేడి చేస్తుంది. దీంతో ఇతర మూలకాలు తొలగిపోయి కార్బన్ ఆధారిత పదార్థం మిగులుతుంది. పార్క్ ఏరోస్పేస్ దీనిపై ప్రత్యేక రెసిన్ పూత పూసి, రక్షణ రంగ సంస్థ ఎల్3 హారిస్కు సరఫరా చేస్తుంది. ఈ వస్త్రం వినియోగానికి ముందు దాదాపు రెండేళ్లపాటు వివిధ పరీక్షలు నిర్వహించాల్సి ఉంటుందని పార్క్ ఏరోస్పేస్ సీఈవో బ్రియాన్ షోర్ వెల్లడించినట్లు సమాచారం. చివరి దశలో పరీక్ష విఫలమైనా మొత్తం ప్రక్రియను మళ్లీ మొదటి నుంచి ప్రారంభించాల్సి ఉంటుంది. పరిమిత సరఫరా, సుదీర్ఘ పరీక్షల కారణంగా పేట్రియాట్ క్షిపణుల ఉత్పత్తిని వేగవంతం చేయడం అమెరికాకు సవాలుగా మారింది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!