స్టాక్ మార్కెట్లలో భారీ పతనం.. 1100 పాయింట్లు నష్టపోయిన సెన్సెక్స్!

భారత స్టాక్ మార్కెట్లు ఇవాళ భారీ అమ్మకాల ఒత్తిడిని ఎదుర్కొన్నాయి. బీఎస్ఈ సెన్సెక్స్, ఎన్‌ఎస్‌ఈ నిఫ్టీలు ఒక్కసారిగా పతనమయ్యాయి. ట్రేడింగ్‌లో సెన్సెక్స్ సుమారు 1100 పాయింట్లు కోల్పోగా, నిఫ్టీ దాదాపు 365 పాయింట్లు పడిపోయింది. ఉదయం నుంచే మార్కెట్లు బలహీనంగా కొనసాగాయి. ఆర్బీఐ తాజా నివేదిక అనంతరం ఇన్వెస్టర్ల స్పందన ప్రతికూలంగా ఉండటం, రెపో రేటుకు సంబంధించిన ఆందోళనలు మార్కెట్‌పై ప్రభావం చూపినట్లు తెలుస్తోంది. రెండు ప్రధాన స్టాక్ ఎక్స్ఛేంజీల్లోనూ ట్రేడింగ్ సుమారు ఒక శాతం మేర తగ్గింది.

మధ్యాహ్నం సమయంలో నిఫ్టీ 22,357 పాయింట్ల వద్ద ట్రేడవుతూ సుమారు 245 పాయింట్లు నష్టపోయింది. అదే సమయంలో సెన్సెక్స్ 71,947 పాయింట్ల వద్ద ఉండగా, దాదాపు 691 పాయింట్లు కోల్పోయింది. మార్కెట్ల పతనంతో సుమారు రూ.8.5 లక్షల కోట్ల మార్కెట్ విలువ ఆవిరైనట్లు సమాచారం. సెన్సెక్స్‌లో ఐటీసీ, అదానీ పోర్ట్స్, ఇండిగో, పవర్ గ్రిడ్, రిలయన్స్ ఇండస్ట్రీస్ వంటి షేర్లు గణనీయంగా నష్టపోయాయి. కొన్ని షేర్లు సుమారు నాలుగు శాతం వరకు పడిపోయాయి. మరోవైపు టెక్ మహీంద్రా, హెచ్‌సీఎల్ టెక్నాలజీస్, టీసీఎస్, ఇన్ఫోసిస్ వంటి ఐటీ కంపెనీల షేర్లు సుమారు రెండు శాతం వరకు లాభపడి మార్కెట్‌కు కొంత మద్దతు ఇచ్చాయి.