

విమాన ఇంధనం (ఏటీఎఫ్) ధరలు, డాలర్తో రూపాయి మారకం విలువ పెరగడం విమానయాన రంగంపై ప్రభావం చూపుతున్నాయి. పశ్చిమాసియాలో యుద్ధ పరిస్థితుల కారణంగా ముడిచమురు ధరలు పెరగడంతో దేశీయ, అంతర్జాతీయ మార్గాల్లో విమాన టికెట్ల ఛార్జీలు గతేడాదితో పోలిస్తే ఈ ఏడాది 20 నుంచి 50 శాతం వరకు పెరిగాయి. దీంతో విమాన ప్రయాణంపై ఆసక్తి చూపిన మధ్యతరగతి ప్రజలు ఖర్చుల విషయంలో ఆచితూచి నిర్ణయాలు తీసుకుంటున్నారు. విమాన ఛార్జీలు అధికం కావడంతో కొందరు వందేభారత్ ఎక్స్ప్రెస్ వంటి రైలు ప్రయాణ ప్రత్యామ్నాయాల వైపు మొగ్గుచూపుతున్నారని ట్రావెల్ పోర్టళ్లు వెల్లడిస్తున్నాయి. ప్రయాణికుల గిరాకీ తగ్గడంతో విమానయాన సంస్థలు కూడా లాభదాయకమైన మార్గాలకే ప్రాధాన్యం ఇస్తూ సర్వీసులను తగ్గిస్తున్నాయి. దేశంలో అందుబాటులో ఉన్న మొత్తం విమానాల్లో దాదాపు ఐదో వంతు ప్రస్తుతం కార్యకలాపాలు నిర్వహించడం లేదని అంచనా.
బ్రిటన్కు చెందిన విమానయాన విశ్లేషణ సంస్థ ఓఏజీ గణాంకాల ప్రకారం, ఈ ఏడాది నవంబరులో దేశీయ, అంతర్జాతీయ మార్గాల్లో అందుబాటులో ఉన్న విమాన సీట్ల సంఖ్య గతేడాది నవంబరుతో పోలిస్తే 3.7 శాతం తగ్గింది. విమాన సర్వీసుల సంఖ్య కూడా 6.2 శాతం క్షీణించింది. దేశీయ ప్రయాణికుల సంఖ్య ఈ ఆర్థిక సంవత్సరం ఏప్రిల్ నుంచి సెప్టెంబరు మధ్య గతేడాది ఇదే కాలంతో పోలిస్తే 1.9 శాతం తగ్గింది. హైదరాబాద్ విమానాశ్రయానికి అందుబాటులో ఉన్న సీట్ల సామర్థ్యం 12.1 శాతం, చెన్నైలో 11.7 శాతం తగ్గింది. ఢిల్లీ, ముంబయి, బెంగళూరు, కోల్కతా సహా పలు ప్రధాన విమానాశ్రయాల్లోనూ ఇదే పరిస్థితి కనిపిస్తోంది. మరోవైపు స్పైస్జెట్ సహా పలు సంస్థలు విమాన సీట్ల సామర్థ్యాన్ని తగ్గించగా, ఆకాశ ఎయిర్ మాత్రం తన విమానాల సంఖ్యను పెంచడంతో సీట్ల సామర్థ్యం వృద్ధి చెందింది. ప్రయాణికుల సంఖ్య కంటే ఆదాయం, లాభదాయకతకే విమానయాన సంస్థలు ప్రాధాన్యం ఇస్తున్నాయని తాజా గణాంకాలు సూచిస్తున్నాయి.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!