ద్రవ్యోల్బణం ఒత్తిడితో రెపో రేటు పెంపుపై ఆర్‌బీఐ కసరత్తు

పెరుగుతున్న ద్రవ్యోల్బణ ఒత్తిళ్ల నేపథ్యంలో భారతీయ రిజర్వ్‌ బ్యాంక్‌ ద్రవ్య పరపతి విధాన కమిటీ (ఎంపీసీ) సమావేశం సోమవారం ప్రారంభమైంది. ఆర్థికవేత్తలు, బ్యాంకింగ్‌ నిపుణుల్లో పలువురు రెపో రేటును 0.25 శాతం పెంచే అవకాశం ఉందని అంచనా వేస్తున్నారు. ఆర్‌బీఐ గవర్నర్‌ సంజయ్‌ మల్హోత్రా అక్టోబర్‌ 7న ఎంపీసీ నిర్ణయాలను ప్రకటించనున్నారు. ఆగస్టు సమీక్షలో రెపో రేటును 5.25 శాతంగా కొనసాగించిన విషయం తెలిసిందే.

పశ్చిమాసియాలో మళ్లీ తీవ్రత పెరిగిన ఉద్రిక్తతలు, చమురు మరియు ఇతర కమోడిటీ ధరల పెరుగుదల నేపథ్యంలో ద్రవ్యోల్బణాన్ని కట్టడి చేసేందుకు ఆర్‌బీఐ కఠిన వైఖరి అవలంబించే అవకాశం ఉందని నిపుణులు భావిస్తున్నారు. ఆగస్టులో రిటైల్‌ ద్రవ్యోల్బణం 4.82 శాతానికి చేరి ఎనిమిది నెలల గరిష్ఠానికి పెరిగింది. రాయిటర్స్‌ సర్వేలో దాదాపు 60 శాతం మంది ఆర్థికవేత్తలు 0.25 శాతం రెపో రేటు పెంపును అంచనా వేశారు.