భారత ఆర్థిక వృద్ధిపై నిర్మలా సీతారామన్ కీలక ప్రకటన

ప్రైవేట్‌ పెట్టుబడులు పుంజుకునేంత వరకు దేశ ఆర్థిక వృద్ధికి మద్దతుగా ప్రభుత్వం పెట్టుబడుల ప్రక్రియను కొనసాగిస్తుందని కేంద్ర ఆర్థిక మంత్రి నిర్మలా సీతారామన్‌ తెలిపారు. మూలధన వ్యయం ద్వారా ఒకవైపు అభివృద్ధికి ఊతమిస్తూనే, మరోవైపు ఆర్థిక క్రమశిక్షణకు ప్రాధాన్యం ఇస్తున్నట్లు ఆమె పేర్కొన్నారు. ప్రభుత్వ పెట్టుబడులు, ఆర్థిక క్రమశిక్షణ మధ్య సమతూకం పాటిస్తూ వృద్ధిని కొనసాగించడమే తమ లక్ష్యమని ఓ కార్యక్రమంలో పాల్గొన్న సందర్భంగా వివరించారు.

గత నాలుగైదేళ్లుగా అనుసరిస్తున్న ఈ వ్యూహం మంచి ఫలితాలను ఇస్తోందని, దేశ ఆర్థిక వ్యవస్థకు ప్రయోజనం చేకూరుస్తోందని నిర్మలా సీతారామన్‌ తెలిపారు. భారత ఆర్థిక వ్యవస్థ 7 శాతానికి పైగా వృద్ధి చెందుతున్న నేపథ్యంలో దేశ భవిష్యత్తుపై ప్రజలు ధీమాతో ఉండాలని సూచించారు. నిరాశావాదాన్ని పక్కనపెట్టి, భారత ఆర్థిక వ్యవస్థ భవిష్యత్తుపై ఆశావహ దృక్పథాన్ని పెంపొందించుకోవాల్సిన అవసరం ఉందని ఆమె అన్నారు.

ఎకానమీకి టాటాలు కీలకం

టాటా సన్స్‌, టాటా ట్రస్ట్స్‌ మధ్య కొనసాగుతున్న వివాదాన్ని వీలైనంత త్వరగా, సామరస్యపూర్వకంగా పరిష్కరించుకోవాలని నిర్మలా సీతారామన్‌ సూచించారు. దేశ ఆర్థిక వ్యవస్థలో టాటా గ్రూప్‌ కీలక పాత్ర పోషిస్తున్న నేపథ్యంలో ఈ వివాదం సుదీర్ఘంగా కొనసాగకూడదని ఆమె అభిప్రాయపడ్డారు. నాయకత్వ స్థానాల్లో ఉన్నవారు తమ విభేదాలను పరిష్కరించుకుని సాధారణ పరిస్థితులు తిరిగి నెలకొనేలా చర్యలు తీసుకుంటారని ఆశాభావం వ్యక్తం చేశారు. విదేశీ పెట్టుబడుల ఉపసంహరణ వంటి అంశాలపై రిటైల్‌ ఇన్వెస్టర్లు, మార్కెట్‌ వర్గాల్లో నెలకొన్న ఆందోళనలను కూడా ప్రభుత్వం పరిశీలిస్తుందని ఆమె వెల్లడించారు.