తెలంగాణలో కొత్త ప్లాంట్‌కు అమర రాజా గ్రీన్ సిగ్నల్‌

అమర రాజా ఎనర్జీ అండ్‌ మొబిలిటీ అనుబంధ సంస్థ అమర రాజా అడ్వాన్స్‌డ్‌ సెల్‌ టెక్నాలజీస్‌ తన బ్యాటరీల తయారీ సామర్థ్యాన్ని భారీగా విస్తరించేందుకు సిద్ధమైంది. ఈ విస్తరణ కోసం రూ.2,320 కోట్లు పెట్టుబడి పెట్టేందుకు కంపెనీ డైరెక్టర్ల బోర్డు ఆమోదం తెలిపింది. ఈ ప్రాజెక్టు పూర్తయితే తెలంగాణలోని అమర రాజా గిగా కారిడార్‌లో ఉన్న ప్లాంట్‌ వార్షిక బ్యాటరీ ఉత్పత్తి సామర్థ్యం ప్రస్తుత 4 గిగావాట్‌ అవర్‌ (GWh) నుంచి 9 గిగావాట్‌ అవర్‌ (GWh)కు పెరగనుంది.

ఈ విస్తరణలో భాగంగా కొత్తగా లిథియం ఐరన్‌ ఫాస్ఫేట్‌ (LFP) సెల్‌ తయారీ ప్లాంట్‌ను కూడా ఏర్పాటు చేయనుంది. విస్తరణకు సంబంధించిన అన్ని కార్యకలాపాలను 30 నెలల్లో పూర్తి చేయాలని కంపెనీ లక్ష్యంగా పెట్టుకుంది. మరోవైపు ఆటోమోటివ్‌ సేవలను అందించేందుకు ఏర్పాటు చేసిన అమరాన్‌ అసిస్ట్‌ ప్రైవేట్‌ లిమిటెడ్‌లో రూ.100 కోట్లు పెట్టుబడి పెట్టేందుకు కూడా బోర్డు ఆమోదం తెలిపింది. ఈ పెట్టుబడులతో బ్యాటరీ తయారీతో పాటు ఆటోమోటివ్‌ సేవల విభాగాన్ని మరింత బలోపేతం చేయాలని కంపెనీ భావిస్తోంది.

ఇదిలా ఉండగా, సెప్టెంబరుతో ముగిసిన రెండో త్రైమాసికంలో అమర రాజా ఎనర్జీ అండ్‌ మొబిలిటీ నికర లాభం తగ్గింది. కన్సాలిడేటెడ్‌ ప్రాతిపదికన కంపెనీ రూ.4,109 కోట్ల ఆదాయాన్ని నమోదు చేయగా, రూ.153 కోట్ల నికర లాభాన్ని ఆర్జించింది. గత ఆర్థిక సంవత్సరం ఇదే త్రైమాసికంతో పోలిస్తే ఆదాయం 18.5 శాతం పెరిగినప్పటికీ, ఖర్చులు పెరగడంతో నికర లాభం 44.8 శాతం తగ్గింది. అయినప్పటికీ వాటాదారులకు ఒక్కో షేరుకు రూ.4.30 మధ్యంతర డివిడెండ్‌ చెల్లించాలని బోర్డు సిఫారసు చేసింది. ఈ నెల 6వ తేదీ నాటికి కంపెనీ రికార్డుల్లో పేర్లు నమోదైన వాటాదారులు ఈ డివిడెండ్‌కు అర్హులు.