హైదరాబాద్‌లో మైక్రోసాఫ్ట్‌ నాలుగో క్లౌడ్‌ రీజియన్‌ ప్రారంభం

అమెరికాకు చెందిన సాంకేతిక దిగ్గజం మైక్రోసాఫ్ట్‌ భారత్‌లో తన నాలుగో క్లౌడ్‌ రీజియన్‌ను హైదరాబాద్‌లో ఏర్పాటు చేసింది. ‘ఇండియా సౌత్‌ సెంట్రల్‌’ పేరుతో ఉన్న ఈ డేటా సెంటర్‌ రీజియన్‌ ఇప్పటికే అందుబాటులోకి వచ్చింది. భారత్‌లో క్లౌడ్‌, కృత్రిమ మేధ మౌలిక వసతులను విస్తరించేందుకు మైక్రోసాఫ్ట్‌ ప్రకటించిన 20.5 బిలియన్‌ డాలర్ల పెట్టుబడి ప్రణాళికలో ఇది కీలక భాగం. పుణె, చెన్నై, ముంబయి తర్వాత హైదరాబాద్‌ మైక్రోసాఫ్ట్‌ నాలుగో క్లౌడ్‌ రీజియన్‌గా నిలిచింది.

హైదరాబాద్‌లోని కొత్త క్లౌడ్‌ రీజియన్‌ మూడు జోన్ల నిర్మాణంతో రూపొందించబడింది. అధునాతన కృత్రిమ మేధ సేవలు, క్లౌడ్‌ ఆధారిత అనువర్తనాలకు అవసరమైన మౌలిక వసతులను అందించేలా దీనిని అభివృద్ధి చేశారు. శీతలీకరణ కోసం నీటికి బదులుగా అధిక సామర్థ్యంతో పనిచేసే యాంత్రిక శీతలీకరణ వ్యవస్థను ఉపయోగిస్తున్నట్లు మైక్రోసాఫ్ట్‌ తెలిపింది. దీంతో శీతలీకరణకు దాదాపు నీటి వినియోగం ఉండదని కంపెనీ పేర్కొంది. హైదరాబాద్‌ కేంద్రం ఆసియా, ప్రపంచ దక్షిణ ప్రాంతానికి వ్యూహాత్మక కేంద్రంగా అభివృద్ధి చెందేలా చర్యలు చేపడుతున్నట్లు వెల్లడించింది.