సైబర్‌ భద్రతకు OpenAI కొత్త AI మోడల్‌..

సైబర్‌ భద్రతా రంగంలో ముప్పులను ముందుగానే గుర్తించి, వాటిని పరిష్కరించేందుకు పరిశోధకులకు సహాయపడేలా OpenAI కొత్త ఆర్టిఫిషియల్‌ ఇంటెలిజెన్స్‌ మోడల్‌ GPT-6 Cyberను విడుదల చేసింది. భద్రతా వ్యవస్థల్లోని లోపాలను గుర్తించడం, వాటిని హ్యాకర్లు ఎలా దుర్వినియోగం చేయవచ్చో పరీక్షించడం, దాడులు జరగకముందే వాటిని సరిదిద్దడంలో ఈ మోడల్‌ తోడ్పడుతుంది. గురువారం తొలుత ఎంపిక చేసిన, విశ్వసనీయ వినియోగదారులకు మాత్రమే దీన్ని అందుబాటులోకి తెచ్చినట్లు OpenAI వెల్లడించింది. తన భద్రతా ప్రమాణాల ప్రకారం సైబర్‌ భద్రత విషయంలో ఈ మోడల్‌కు ‘క్రిటికల్‌’ స్థాయి రేటింగ్‌ ఇచ్చింది. పరిశోధకులు దీని సాయంతో Mozilla Firefoxలో గతంలో గుర్తించని 81 భద్రతా లోపాలను కనుగొనగా, వాటిని అధిక తీవ్రత కలిగినవిగా Mozilla వర్గీకరించింది. వాటికి పరిష్కారాలను విడుదల చేసే ప్రక్రియను కూడా ప్రారంభించింది. అలాగే Linux కెర్నల్‌లోని 948 లోపాలను దుర్వినియోగం చేయగలిగే విధానాలను రూపొందించడంలో ఈ మోడల్‌ సహాయపడిందని, వాటిలో 588 గతంలో గుర్తించనివని OpenAI తెలిపింది.

Linux వ్యవస్థలో గుర్తించిన 304 కీలక భద్రతా సమస్యలను వాటి నిర్వహణ బాధ్యతలు చూసే బృందాలకు తెలియజేయడంతో పాటు, పరిష్కారాలకు సంబంధించిన ప్రతిపాదనలను కూడా OpenAI అందించింది. గత మోడల్‌ GPT-5.6 Cyberకు ఇచ్చిన ‘హై’ రేటింగ్‌ను తాజా మోడల్‌కు ‘క్రిటికల్‌’ స్థాయికి పెంచింది. హానికర సైబర్‌ కార్యకలాపాలకు పాల్పడే వ్యక్తులు, సంస్థలు AIని దుర్వినియోగం చేసేందుకు ప్రయత్నాలు పెంచుతున్నాయని కంపెనీ పేర్కొంది. ప్రస్తుతం అధునాతన సైబర్‌ భద్రతా పరీక్షలు, పెనెట్రేషన్‌ టెస్టింగ్‌, ఎక్స్‌ప్లాయిట్‌ డెవలప్‌మెంట్‌ వంటి అనుమతితో కూడిన కార్యకలాపాల కోసం రూపొందించిన Daybreak Red ప్రోగ్రామ్‌లోని ఎంపిక చేసిన వినియోగదారులకు GPT-6 Cyberను అందిస్తోంది. రాబోయే వారాల్లో అర్హత పొందిన Daybreak Red వినియోగదారులందరికీ దీని యాక్సెస్‌ను విస్తరించనుంది. మరోవైపు, GPT-5.6 Cyber మోడల్‌ను గురువారం నుంచే ఈ ప్రోగ్రామ్‌లోని వినియోగదారులందరికీ అందుబాటులోకి తెచ్చింది.