లలితా జువెలరీ ఐపీఓకు అదిరిపోయే ఆరంభం..

ప్రముఖ ఆభరణాల సంస్థ లలితా జువెలరీ మార్ట్‌ స్టాక్‌ మార్కెట్‌లో ఘనంగా అరంగేట్రం చేసింది. ₹201 ఇష్యూ ధరతో పోలిస్తే బీఎస్‌ఈలో 31.99 శాతం ప్రీమియంతో ₹265.30 వద్ద షేర్లు లిస్టయ్యాయి. ఎన్‌ఎస్‌ఈలో 31.84 శాతం ప్రీమియంతో ₹265 వద్ద ట్రేడింగ్‌ ప్రారంభించాయి. బలమైన ఇన్వెస్టర్ల స్పందన నేపథ్యంలో కంపెనీ షేర్లకు మార్కెట్‌లో మంచి ఆదరణ లభించింది.

₹1,700 కోట్ల విలువైన లలితా జువెలరీ ఐపీఓ ఆగస్టు 17న ప్రారంభమై 19న ముగిసింది. ఇందులో ₹1,200 కోట్ల ఫ్రెష్‌ ఇష్యూ, ₹500 కోట్ల ఆఫర్‌ ఫర్‌ సేల్‌ ఉన్నాయి. ఈ ఐపీఓకు ఏకంగా 62.97 రెట్ల సబ్‌స్క్రిప్షన్‌ లభించింది. 1985లో ప్రారంభమైన లలితా జువెలరీ మార్ట్‌ దక్షిణ భారత మార్కెట్‌పై ప్రధానంగా దృష్టి సారించి, తమిళనాడు, ఆంధ్రప్రదేశ్‌, తెలంగాణ, కర్ణాటక, పుదుచ్చేరిలో స్టోర్లను నిర్వహిస్తోంది.