

దేశీయ మార్కెట్లో బంగారం, వెండి ధరలు శుక్రవారం భారీగా తగ్గాయి. హైదరాబాద్ మార్కెట్లో ఉదయం 9.30 గంటల సమయానికి 10 గ్రాముల 24 క్యారెట్ల బంగారం ధర రూ.1.30 లక్షల దిగువకు పడిపోయి రూ.1,27,900కు చేరింది. క్రితం రోజు ముగింపు ధర సుమారు రూ.1.33 లక్షలతో పోలిస్తే దాదాపు రూ.5,300 తగ్గింది. వెండి ధర కూడా భారీగా పతనమైంది. కిలో వెండి ధర క్రితం రోజు సుమారు రూ.1.65 లక్షలు ఉండగా, శుక్రవారం రూ.1,54,680కు దిగొచ్చింది. అంటే ఒక్కరోజులోనే రూ.10 వేలకుపైగా తగ్గింది.
అంతర్జాతీయ మార్కెట్లో ఔన్సు స్పాట్ గోల్డ్ ధర 3,546 డాలర్లుగా నమోదైంది. కొంతకాలంగా 4,000 డాలర్లకు పైన కొనసాగిన పసిడి ధర.. కొద్ది రోజుల వ్యవధిలోనే 500 డాలర్లకు పైగా తగ్గింది. ఔన్సు వెండి ధర 41.84 డాలర్ల వద్ద ఉంది. కమొడిటీ ఎక్స్ఛేంజ్లో డిసెంబరు డెలివరీ గోల్డ్ ఫ్యూచర్స్ 10 గ్రాములకు రూ.1.22 లక్షల వద్ద, కిలో వెండి ఫ్యూచర్స్ రూ.1.49 లక్షల వద్ద కొనసాగుతున్నాయి. అమెరికా డాలర్ బలపడటం, ట్రెజరీ బాండ్లపై ప్రతిఫలం పెరగడంతో పెట్టుబడిదారులు బంగారం, వెండి నుంచి ఇతర పెట్టుబడుల వైపు మళ్లుతున్నారు. అంచనాలకు మించి నమోదైన ద్రవ్యోల్బణం, బలమైన ఆర్థిక గణాంకాల నేపథ్యంలో డిసెంబరులో ఫెడరల్ రిజర్వ్ వడ్డీ రేట్లు పెంచవచ్చనే అంచనాలు కూడా పసిడి, వెండి ధరలపై ఒత్తిడి పెంచుతున్నాయి.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!