ఎయిర్‌టెల్ పోస్ట్‌పెయిడ్ ప్లాన్ల ధరలు పెంపు...

భారతీ ఎయిర్‌టెల్ తన పోస్ట్‌పెయిడ్ వినియోగదారులకు సంబంధించిన ప్లాన్ల ధరలను సవరించింది. సుమారు 3 నుంచి 10 శాతం వరకు టారిఫ్‌లను పెంచుతున్నట్లు ప్రకటించిన సంస్థ, కొత్త ధరలు అక్టోబర్ 8 నుంచి అమల్లోకి వస్తాయని తెలిపింది. అయితే ధరల పెంపుతో పాటు వినియోగదారులను ఆకర్షించేందుకు కొత్త ఉచిత అంతర్జాతీయ రోమింగ్ ప్రయోజనాన్ని కూడా అందుబాటులోకి తీసుకొచ్చింది. సవరించిన ప్రతి ప్లాన్‌లోని ఒక్కో సిమ్‌కు ఏడాదికి ఒకసారి కాంప్లిమెంటరీ ఇంటర్నేషనల్ రోమింగ్ ప్యాక్ లభిస్తుంది.

ఈ ఉచిత రోమింగ్ ప్యాక్‌కు 5 రోజుల వ్యాలిడిటీ ఉండటంతో పాటు 5జీబీ డేటా, 60 నిమిషాల కాల్స్, 25 అవుట్‌గోయింగ్ ఎస్ఎంఎస్‌లు, ఉచిత ఇన్‌కమింగ్ ఎస్ఎంఎస్ సదుపాయాలు ఉంటాయి. తరచుగా విదేశాలకు వెళ్లే వినియోగదారులకు ఈ ప్రయోజనం ఉపయోగపడుతుందని ఎయిర్‌టెల్ తెలిపింది. కొత్త ధరల ప్రకారం వ్యక్తిగత కనెక్షన్ ప్లాన్ రూ.449 నుంచి రూ.499కు, రెండు సిమ్‌ల ఫ్యామిలీ ప్లాన్ రూ.699 నుంచి రూ.749కు పెరిగింది. మూడు సిమ్‌ల ప్లాన్ రూ.999 నుంచి రూ.1,049కు చేరింది. నాలుగు, ఐదు సిమ్‌ల ప్లాన్ల ధరలు కూడా సవరించబడ్డాయి. నెట్‌ఫ్లిక్స్ స్టాండర్డ్ సబ్‌స్క్రిప్షన్‌తో వచ్చే ఐదు సిమ్‌ల ప్లాన్ ధర రూ.1,799గా నిర్ణయించారు.