బ్రిటన్ పోర్టులపై అదానీ కన్ను

బ్రిటన్‌కు చెందిన ప్రముఖ పోర్ట్ ఆపరేటర్ అసోసియేటెడ్ బ్రిటిష్ పోర్ట్స్ (ఏబీపీ)లో 63.88 శాతం వాటా కొనుగోలుకు అదానీ పోర్ట్స్ అండ్ స్పెషల్ ఎకనామిక్ జోన్ (ఏపీసెజ్) సిద్ధమవుతున్నట్లు సమాచారం. ఈ డీల్ విలువ సుమారు 10 బిలియన్ డాలర్లు (దాదాపు రూ.95,000 కోట్లు)గా అంచనా వేస్తున్నారు. ఈ ఒప్పందం పూర్తయితే బ్రిటిష్ పోర్ట్ రంగంలో భారతీయ సంస్థ చేసిన అతిపెద్ద పెట్టుబడిగా నిలిచే అవకాశం ఉంది.

ఏబీపీ ఇంగ్లండ్, స్కాట్లాండ్, వేల్స్‌లోని 21 కీలక నౌకాశ్రయాలను నిర్వహిస్తోంది. యూకే సముద్ర వాణిజ్యంలో దాదాపు 25 శాతం ఈ పోర్టుల ద్వారానే జరుగుతోంది. యూకేలో అతిపెద్ద కార్గో పోర్ట్ ఇమ్మింగ్‌హమ్, ప్రధాన ఎగుమతి కేంద్రం సౌతాంప్టన్ కూడా ఏబీపీ ఆధ్వర్యంలోనే ఉన్నాయి. గత ఏడాది ఈ సంస్థ 425 మిలియన్ టన్నుల సరుకు రవాణా నిర్వహించి £819.8 మిలియన్ ఆదాయం ఆర్జించింది.

ప్రస్తుతం ఏబీపీలోని 63.88 శాతం వాటా కెనడాకు చెందిన రెండు పెన్షన్ ఫండ్ల చేతిలో ఉంది. ఈ వాటా కొనుగోలుపై అదానీ పోర్ట్స్ చర్చలు జరుపుతున్నట్లు తెలుస్తోంది. అయితే ఈ విషయంపై అదానీ గ్రూప్ అధికారికంగా స్పందించలేదు. ఇదే సమయంలో ఏపీసెజ్ తొలి త్రైమాసికంలో రూ.3,649 కోట్ల నికర లాభం నమోదు చేయగా, అదానీ ఎంటర్‌ప్రైజెస్ మాత్రం రూ.1,160.23 కోట్ల నష్టాన్ని ప్రకటించింది.