‘కెప్టెన్‌గానే కాదు.. ప్లేయర్‌గానూ గుర్తించాలి’.. రాహుల్‌ ద్రవిడ్‌ మాటలను గుర్తుచేసుకున్న గంగూలీ

భారత మాజీ కెప్టెన్‌ సౌరవ్‌ గంగూలీ తన సన్నిహిత మిత్రుడు, మాజీ సహచరుడు రాహుల్‌ ద్రవిడ్‌తో ఉన్న అనుబంధాన్ని గుర్తుచేసుకున్నారు. రిటైర్మెంట్‌ తర్వాత తన గురించి మాట్లాడినప్పుడల్లా ఎక్కువగా కెప్టెన్సీ, నాయకత్వం గురించే ప్రస్తావించేవారని గంగూలీ తెలిపారు. అయితే, ఒకసారి రాహుల్‌ ద్రవిడ్‌ తనను కేవలం కెప్టెన్‌గా కాకుండా గొప్ప ఆటగాడిగా కూడా గుర్తించాలని గుర్తుచేశారని చెప్పారు. ద్రవిడ్‌ చెప్పిన ఆ మాటలు తనకు ఎంతో విలువైనవిగా అనిపించాయని గంగూలీ పేర్కొన్నారు. వీరిద్దరి అనుబంధం యువ క్రికెట్‌ రోజుల నుంచే కొనసాగుతోంది. 1996లో లార్డ్స్‌లో జరిగిన టెస్టులో ఇద్దరూ ఒకేసారి అరంగేట్రం చేశారు.

గంగూలీ తన అంతర్జాతీయ కెరీర్‌లో టెస్టులు, వన్డేల్లో కలిపి 18,575 పరుగులు, 38 సెంచరీలు సాధించారు. వన్డేల్లో 11,363 పరుగులతో పాటు 100 వికెట్లు కూడా తీసుకున్నారు. 2000 నుంచి 2005 వరకు భారత జట్టుకు కెప్టెన్‌గా వ్యవహరిస్తూ యువ ఆటగాళ్లకు అండగా నిలిచారు. విదేశాల్లోనూ పోటీతత్వాన్ని చూపించే భారత జట్టును తీర్చిదిద్దడంలో ఆయన నాయకత్వం కీలక పాత్ర పోషించింది. గంగూలీ-ద్రవిడ్‌ మధ్య ఉన్న పరస్పర గౌరవం భారత క్రికెట్‌లోని ఆ తరానికి ప్రత్యేక గుర్తింపుగా నిలిచింది.