బ్యాడ్మింటన్‌ కు సైనా నెహ్వాల్ రిటైర్మెంట్..

భారత బ్యాడ్మింటన్ చరిత్రలో కీలక పాత్ర పోషించిన సైనా నెహ్వాల్ అంతర్జాతీయ బ్యాడ్మింటన్‌కు వీడ్కోలు పలికారు. తాను అంతర్జాతీయ పోటీల నుంచి రిటైర్ అవుతున్నట్లు సైనా స్వయంగా ధృవీకరించారు. గత రెండేళ్లుగా తీవ్రంగా వెంటాడుతున్న క్రానిక్ మోకాలి నొప్పి కారణంగా, తన శరీరం ఇక ఎలైట్ స్థాయి క్రీడల ఒత్తిడిని భరించలేకపోతుందని ఆమె వెల్లడించారు.

సోమవారం సుభోజిత్ ఘోష్‌తో నిర్వహించిన ఒక పాడ్‌కాస్ట్‌లో మాట్లాడుతూ, తన రిటైర్మెంట్ నిర్ణయాన్ని సైనా అధికారికంగా తెలియజేశారు. 2023 జూన్ తర్వాత నుంచి ఆమె ఎలాంటి అంతర్జాతీయ టోర్నమెంట్లలోనూ పాల్గొనలేదు. అయితే రిటైర్మెంట్ విషయంలో ప్రత్యేకంగా ఫార్మల్ అనౌన్స్‌మెంట్ అవసరం లేదని ఆమె అభిప్రాయపడ్డారు.  నేను నా ఇష్టంతోనే ఆటలోకి వచ్చాను, అదే ఇష్టంతో ఇప్పుడు బయటకు వస్తున్నాను అని సైనా స్పష్టం చేశారు.

సైనా కెరీర్‌లో 2012 లండన్ ఒలింపిక్స్‌లో కాంస్య పతకం సాధించి, భారత మహిళల బ్యాడ్మింటన్‌లో తొలి ఒలింపిక్ మెడల్ గెలిచిన క్రీడాకారిణిగా చరిత్ర సృష్టించారు. అలాగే వరల్డ్ నెంబర్ వన్‌గా నిలిచిన తొలి భారతీయ మహిళగా ఆమె అరుదైన ఘనతను అందుకున్నారు. రెండు కామన్వెల్త్ గేమ్స్ గోల్డ్ మెడల్స్, ఆసియా గేమ్స్ బ్రాంజ్ మెడల్స్‌తో పాటు పలు BWF సూపర్ సిరీస్ టైటిల్స్ కూడా ఆమె ఖాతాలో ఉన్నాయి.

భారత మహిళల బ్యాడ్మింటన్‌ను అంతర్జాతీయ స్థాయికి తీసుకెళ్లిన ట్రయిల్‌బ్లేజర్‌గా సైనా గుర్తింపు పొందారు. పీవీ సింధు, లక్ష్య సేన్ వంటి కొత్త తరం ఆటగాళ్లకు ఆమె గొప్ప ప్రేరణగా నిలిచారు. రిటైర్మెంట్ అనంతరం హర్యానాలో ఒక బ్యాడ్మింటన్ అకాడమీ ఏర్పాటు చేయాలనే ఆలోచనలో సైనా ఉన్నట్లు సమాచారం.