యూరప్ లీగ్‌లో రాహుల్ ద్రవిడ్ కొత్త బాధ్యత

భారత క్రికెట్ దిగ్గజం రాహుల్ ద్రవిడ్ యూరోపియన్ టీ20 ప్రీమియర్ లీగ్‌లో కీలక పాత్ర పోషించనున్నారు. డబ్లిన్ గార్డియన్స్ జట్టు యజమానిగా ఆయనను అధికారికంగా ప్రకటించారు. యూరప్‌లో క్రికెట్ అభివృద్ధి, యువ ఆటగాళ్లకు అవకాశాలు కల్పించడమే ఈ లీగ్ ప్రధాన లక్ష్యమని ద్రవిడ్ తెలిపారు. డబ్లిన్‌లో ఇప్పటికే క్రికెట్‌కు మంచి ఆదరణ ఉందని, భవిష్యత్ తరానికి ఈ లీగ్ మంచి వేదికగా మారుతుందని ఆయన పేర్కొన్నారు.

డబ్లిన్ గార్డియన్స్ జట్టుకు భారత మాజీ స్పిన్నర్ రవిచంద్రన్ అశ్విన్ కెప్టెన్‌గా వ్యవహరించనున్నారు. ఈ లీగ్‌లో బెల్‌ఫాస్ట్, ఎడిన్‌బర్గ్, గ్లాస్గో, రోటర్‌డామ్, ఆమ్స్‌టర్‌డామ్ జట్లు పాల్గొంటాయి. అభిషేక్ బచ్చన్, జాంటీ రోడ్స్, క్రిస్ గేల్, స్టీవ్ వా వంటి ప్రముఖులు కూడా ఈ లీగ్‌తో అనుబంధం కలిగి ఉన్నారు. తొలి సీజన్ ఆగస్టు 26 నుంచి సెప్టెంబర్ 20 వరకు నిర్వహించనున్నారు.