ట్రంప్‌ కంపెనీకి ఊహించని ఎదురుదెబ్బ!

అమెరికా అధ్యక్షుడు డొనాల్డ్‌ ట్రంప్‌కు చెందిన ప్రముఖ సామాజిక మాధ్యమ వేదిక ‘ట్రూత్‌ సోషల్‌’ మాతృ సంస్థ ట్రంప్‌ మీడియా అండ్‌ టెక్నాలజీ గ్రూప్‌ (టీఎంటీజీ) భారీ నష్టాలను చవిచూసింది. రెండో త్రైమాసికంలో కంపెనీకి 238 మిలియన్‌ డాలర్లు, అంటే సుమారు రూ.2,000 కోట్ల నికర నష్టం నమోదైంది. కంపెనీ ఆదాయం పెరిగినప్పటికీ, క్రిప్టో కరెన్సీలు, డిజిటల్‌ ఆస్తుల మార్కెట్‌లో చోటుచేసుకున్న భారీ పతనం ఈ నష్టాలకు ప్రధాన కారణంగా నిలిచినట్లు ఆర్థిక విశ్లేషకులు చెబుతున్నారు.

నష్టాలను అధిగమించేందుకు కంపెనీ సామాజిక మాధ్యమ వ్యాపారంపైనే ప్రధానంగా దృష్టి పెట్టాలని నిర్ణయించింది. ఆన్‌లైన్‌ బెట్టింగ్‌, క్రిప్టో వంటి రంగాలపై ఆధారపడటాన్ని తగ్గించి, కొత్త ఫీచర్లతో వినియోగదారుల సంఖ్యను పెంచేందుకు చర్యలు చేపడుతోంది. ఆదాయాన్ని పెంచుకునేందుకు ‘ట్రూత్‌ ఏపీఐ’ సేవను కూడా విస్తరిస్తోంది. వాల్‌స్ట్రీట్‌ వాణిజ్య సంస్థలకు డొనాల్డ్‌ ట్రంప్‌ సహా ప్రముఖుల పోస్టులను ఇతరుల కంటే కొన్ని మిల్లీసెకన్ల ముందుగానే చూసే సదుపాయాన్ని అందిస్తోంది. ఇందుకోసం నెలకు 60,000 నుంచి 1,00,000 డాలర్ల వరకు రుసుము వసూలు చేస్తుండగా, ఇప్పటికే పది అధిక వేగంతో వాణిజ్యం చేసే సంస్థలు ఒప్పందం చేసుకున్నట్లు సమాచారం.